Adili si i shtëpisë, Zguro revolton tifozët shkodranë

Vllaznia-bylisi nuk mblodhi më shumë se 300 tifozë në stadiumin “Loro Boriçi”. “Panorama Sport” ju sjell edhe pikantet e ndeshjes, ku protagonist absolut u bë mbrojtësi i majtë i ballshiotëve, Vangjel Zguro. Ky i fundit, nisur edhe nga një precedent i sezonit të kaluar kur ishte pjesë e Skënderbeut, revoltoi shumë tifozët shkodranë. Që në momentin kur lojtarët e Bylisit kanë mbërritur në stadium, një sërë ofendimesh kanë shkuar në drejtim të Zguros. Kësisoj, pogradecari nuk ka qenë i qetë më pas në fushë dhe në pjesën e dytë u zëvendësua.

Në minutën e 14-të Zguro kapet me ata pak tifozë të pranishëm, duke ndezur edhe një tjetër debat dhe sharje në drejtim të tij nga tribuna. Kjo bëri që pjesa e parë të mbyllet me një situatë tensioni në tunel pas rënies së bilbilit. Ndërhyrja e forcave të sigurisë dhe delegatit, bëri që skuadrat të shpërndaheshin shpejt drejt dhomave. Në këtë moment pogradecari pati një përplasje me stolin e ekipit shkodran dhe u desh ndërhyrja e lojtarëve të tjerë për të qetësuar situatën.

Sulmuesi i Vllaznisë, Bekim Balaj, u përqafua me Zguron në momentin që ky i fundit do të zëvendësohej, por as kjo situatë nuk qetësoi tifozët shkodranë, të cilët nuk ngurruan të ofendonin lojtarin mik.

Mbrojtësi Mevlan Adili rikthehet si kundërshtar në Shkodër. Fillimisht ai pati një takim miqësor me Josën dhe më pas takoi shokët që ka lënë në ekipin shkodran, por pa lënë mënjanë gazetarët.

Përqafime brazilianësh në prag të nisjes së pjesës së dytë të takimit mes sulmuesve Kaina Nunjesh dhe Felipe Soza.