Bylisi bën ndryshime në staf, dy titullarë mungojnë ndaj “demave”
Bylisi dje ka zbritur në fushën e stërvitjes në Ballsh, me zhgënjimin për mënyrën sesi shkoi loja në ndeshjen ndaj Teutës, ku në fund dolën pa pikë. Synimi ishte marrja e një rezultati pozitiv, ndërsa ekipi vazhdon që të shpërdorojë raste duke vuajtur mungesën e njeriut gol. Mallakastriotët kanë qenë një nga skuadrat më aktive të elitës në merkaton e janarit duke afruar lojtarë me eksperiencë, që kanë shfaqur vlera në Superiore. Ndërsa ballshiotët pritet që të kenë gati edhe lojtarin brazilian Zho Santos. Ajo që u vu re në ndeshjen me Teutën ishte edhe plotësimi i stafit teknik me një përgatitës atletik. Me largimin e grekut Mikailidhis, që ishte edhe “krahu i djathtë” i Arian Bellait, Naxhi Shensoi do të ketë në staf Mustafa Serdar, që ka punuar më parë në Turqi me Istanbulspor, si dhe me Llapin së fundmi në Kosovë. Tashmë e gjithë vëmendja e skuadrës është përqendruar te sfida e së dielës, ku Bylisi pret Partizanin në Ballsh. Mallakastriotët do të kenë gati dy lojtarët që përfunduan dënimin me kartonë, Aleksandër Damçevskin dhe Xhoele Maçollin, dy titullarë në pjesën më të madhe të takimeve të këtij sezoni. Ndërkohë, trajneri Naxhi Shensoi sërish do të ketë mungesa, pasi duhet të bëjë pa Aleksandër Trumçin dhe Felipe Souzën, që kanë plotësuar numrin e katër kartonëve të verdhë. Në sajë të afrimeve të fundit në çdo repart, skuadra mallakastriote e ka organikën më të plotë dhe alternativat në stol nuk mungojnë. Gjithsesi, në Ballsh tashmë po punojnë dhe janë të përqendruar që të kërkojnë kthesën të dielën me Partizanin në “Adush Muça”.