Spahiu: Na “mundi” presioni, por gjashtëshen do ta kapim
Luzi 2008 pësoi humbjen e dytë rresht, aq sa kishte pësuar në gjithë fazën e parë. Ngushëllim i vetëm, mund të quhet fakti se u mund nga dy kryesuesit e kampionatit, por ndryshe nga humbja me Dinamon, ku luznjakët morën vlerësim maksimal për lojën e luajtur në fushë, kjo nuk mund të thuhet për humbjen përballë Flamurtarit. Këtë fakt e pranon edhe një nga futbollistët më të mirë të kavajasve, Ermir Spahiu. “Është e vërtetë që ndaj Flamurtarit nuk arritëm dot të dilnim në lojën tonë të përhershme, madje edhe të javës së kaluar në Tiranë me Dinamon. Ndoshta ka qenë loja jonë më e dobët e luajtur këtë sezon. Jemi mundur edhe në Peshkopi, por kemi treguar se luajmë një futboll me vlera. Me Flamurtarin nuk e di çfarë na ndodhi, por duke nisur nga unë, e vuajtëm shumë presionin psikologjik dhe emocional përballë një fanelle si ajo e vlonjatëve. Mosha shumë e re, me sa duket nuk përballoi dot dy sfida rresht, me dy emra të mëdhenj si Dinamo e Flamurtari. Nuk arritëm dot të kemi atë lirshmëri me të cilën kemi luajtur deri tani. Gjykoj se e merituam humbjen, por mos na paragjykoni në vetëm dy ndeshje, fundja ishin dy kryesueset dhe me përvojë 100 herë më të madhe se Luzi”, tha fillimisht sulmuesi. 20-vjeçari e konsideron tani në njëfarë mase çështje “fati” që sfidat me kryesuesit mbaruan me përjashtim të sfidës me Skënderbeun. “Besoj se të gjithë rivalët tanë do të munden nga Dinamo e Flamurtari e kështu ne i ‘hoqëm’ qafe në fillim. Tani do të përqendrohemi te sfidat e tjera për t’u rikthyer te loja jonë dhe fitoret. Ndërkohë, në ekip janë afruar edhe disa futbollistë me përvojë, kështu me një kontingjent më të plotë, me kthimin në Luz kundër Korabit, do të shihni ekipin që keni parë në fazën e parë. Fundja mos prisni që të dalim kampion, por në fund do të jemi të pozicionuar në një nga 6 vendet e para të klasifikimit. Këtë e besoj fort”, e ka mbyllur Spahiu.