Juvja, ka të drejtë për gjyq objektiv dhe të ndershëm
Le ta nisim nga fundi: Juventus - si çdo klub ose individ tjetër i akuzuar në një proces të zakonshëm ose sportiv - ka të drejtën e një gjykimi të drejtë, nga një gjyqtar objektiv dhe i paanshëm e po ashtu të hetohet nga një prokuror i pakushtëzimuar që nuk e paragjykon e sidomos pa “tifozllëk”. Duket si një koncept i parëndësishëm, por që duhet të përsëritet me forcë duke pasur parasysh atë që po del këto ditë, duke gërmuar në të shkuarën e një prej prokurorëve të hetimit Prisma (Çiro Santorielo) dhe atyre që janë pjesë e bordit të garancisë Coni (Vinçenco Çezaro dhe Pier Xhorxh Mafexoli). Deklarata të turpshme të prokurorit, të lëshuara 4 vjet më parë në një konferencë, dhe postime të vjetra të shkruara në rrjetet sociale, të cilat në rastin më të mirë tregojnë një naivitet të papranueshëm për ata që mbajnë role të caktuara dhe në rastin më të keq një neveri që mund të minojë ndershmërinë e gjykimit ndaj “Zonjës së Vjetër”.
- Dëgjimi i fjalive si (“E pranoj, e ndjek dhe jam një tifoz i madh i Napolit dhe e urrej Juventusin. Si prokuror, jam kundër Juventusit, kundër hajdutëve të fushave të blerta”) dhe të lexosh disa postime (“Superliga përfaqëson një faqe tjetër të ndyrë në historinë e Anjelëve”) apo disa mesazhe (“Kontribuoni duke lënë një mesazh Juve bajga”) ngjallin shqetësim dhe bezdi. Fjali që duken si të thëna në një lokal, ku disa tifozë përkeqësojnë konceptet me shallin e ekipit të tyre të zemrës në qafë. Por në fakt po flasim për profesionistë. Siç ishte e kuptueshme, zemërata e tifozëve juventinë u shpërnda në rrjetet sociale pasi ndihen të rrethuar dhe viktima të një komploti. Duhet mbajtur mend gjithmonë se vendimi i Gjykatës së Apelit që dënoi Juventusin nuk bazohej në një ndërtim të ngjarjeve sipas prokurorit, por në deklarata të protagonistëve, pra të dhëna objektive.
- Françesko Kalvo, drejtuesi i ri i Juventusit, shfaqi elegancë dhe stil para ndeshjes kundër Salernitanës kur duke folur për deklaratat e Santorielos, tha: “Mendoj se disa fjali të nxjerra nga konteksti mund të marrin një kuptim tjetër nga ai që kanë. Kjo vlen për Juventusin dhe këdo. Pra edhe për njerëzit e përfshirë në hetimin ndaj nesh gjithashtu. Ne si klub gjithmonë respektojmë, por edhe pretendojmë respekt”. Këtë nuk e kërkon vetëm klubi i Juventusit dhe tifozët e tij, por duhet ta kërkojmë të gjithë: institucionet, mediat dhe sportistët që kujdesen për ekipe të ndryshme. Sepse herët a vonë pozicionet mund të ndryshojnë. Kushdo që thirret të luajë role shumë të rëndësishme si ai i prokurorit, ka për detyrë të peshojë fjalët e tij në çdo rrethanë. Dhe ata që zgjedhin profesionistë, si ata të kolegjit të garancisë Coni, e kanë për detyrë (të vështirë, e kuptojmë) të kontrollojnë tërësisht të tashmen dhe të shkuarat e tyre, qoftë edhe në rrjetet sociale.