Bastet dhe e drejta TV jashtë shtetit, Liga vihet në lëvizje
Synohet rritja e të ardhurave për kampionatin shqiptar
Bastet edhe e drejta televizive vendosin në lëvizje Ligën Profesioniste të Futbollit. Gjatë ditës së djeshme, zyrtarët e Ligës kanë pritur në një takim Sekretarin e Përgjithshëm të Ligave Europiane, për të sjellë benefitet e anëtarësimit të Ligës Profesioniste mes Ligave Europiane, në nëntor të 2022-shit. Ardhja e italianit Alberto Kolombo synon të ndihmojë klubet që të rrisin më tej standardizimin e futbollit profesionist në vend. Me anëtarësimin mes Ligave Europiane, ajo që është kryesorja mbetet rritja e të ardhurave për Superioren, ku synohet komercializimi i ligës, shitja e të drejtave televizive jashtë Shqipërisë, që të bëjë të mundur që kampionati ynë të ndiqet edhe në vendet e rajonit, çka do të sillte të ardhura shtesë. Një pikë tjetër është shitja e të dhënave teknike ose kuotat për kompanitë e basteve në vendet e tjera, po ashtu edhe të kompanive që merren me statistika. Problemi që shihet këtu është se Liga Profesioniste, edhe pse është krijuar që prej 2018-ës, ka mbetur ende në një fazë fillestare dhe nuk është se ka bërë ndonjë progres,
teksa ka mbetur gjithmonë nën tutelën e FSHF-SË.
ASGJË KONKRETE
Fillimisht Alberto Kolombo u prit në një takim në Shtëpinë e Futbollit nga presidenti i FSHF-SË Armand Duka dhe Ilir Shulku, ku më pas vizitoi edhe kompleksin e Partizanit,
ku u njoh me zhvillimet e futbollit shqiptar dhe shumë mirë bëri, sepse nuk ka asgjë të keqe, por në këtë aspekt Liga Profesioniste nuk ka bërë asgjë dhe madje ka plotësuar disa kritere minimale për t’u anëtarësuar mes Ligave Europiane pesë vite më vonë nga themelimi. I
gjithë opinion sportiv e di që Liga ka qenë inekzistente gjatë gjithë kësaj kohe. Ndërkohë që në këtë takim Liga Profesioniste duhet të evidentonte hapat që ka bërë përpara dhe mangësitë që ka, pasi jo më pak se disa muaj më parë, shitja e të drejtës TV për Superioren,
Kategorisë së Parë dhe Kupës së Shqipërisë, u bë nga FSHFJA dhe jo nga Liga. Në këtë marrëdhënie FSHF-JA duhet të jetë një bashkëpunuese e mirë, ashtu siç është Liga Europiane me Qeveritë e Futbollit, UEFA dhe FIFA. Ajo që është më tepër e rëndësishme sa u
përket Ligave, është se klubet duhet të mendojnë të pavarura për të gjeneruar të ardhurat e tyre. Ndërkohë, sipas prononcimit të presidentit të Ligës Profesioniste Edvin Libohova, Liga është ende në fazë tranzitore dhe ky takim do të ndihmojë shumë për të ardhmen.