Perlë e Adejemit, Çelsi në nokaut
Spektakël në Dortmund, anglezët shpërdorojnë pafund dhe humbasin 90 minutat e para Benfika fiton 2-0 në transfertë me Bryzhin dhe është me një këmbë në çerekfinale
Nëntëdhjetë minu tat e para të një beteje që zgjat 180’ shkojnë për... Borusian e Dortmundit. Në “Signal Iduna Park” një gol i Adejemit sposton peshoren e parashikimeve nga ana e skuadrës gjermane. Gol spektakolar i denjë për kronikën e ndeshjes: një kundërsulm i vetëm, dopiodriblim fillimisht ndaj Enzo Fernandezit dhe pastaj ndaj portierit Kepa dhe prekja finale me portën e boshatisur. Një kryevepër e denjë për manualet e kundërsulmit që bën diferencën në një ndeshje të gjallë dhe me raste pafund, por edhe e ekuilibruar, me ritëm të shfrenuar dhe të shpejtë. Blutë e Londrës i afrohen më shumë golit të avantazhit (Zhoao Feliksin e ndal edhe traversa) dhe pastaj janë edhe ajo ndërhyrje shpëtimtare mbi vijën fatale e Xhanit ndaj Kulibalit dhe mrekullia e Kobelit ndaj Fernandezit. Por goli nuk vjen për skuadrën e Graham Poterit dhe konfirmon edhe njëherë tjetër sezonin e çuditshëm që po kalon skuadra e tij. Nuk ka përfunduar ende diskutimi i kualifikimit në çerekfinalet e Ligës së Kampioneve, sepse të martën në 7 mars, në “Stamford Bridge” do të luhet edhe akti i dytë. Një mbrëmje në të cilën Çelsi, me tifozët e vet pas shpine, nuk mund ta gabojë.
BENFIKA – Në duelin tjetër të 1/8-ave të Champions-it, diferencat e portugezëve me dy Klub Bryzhin vihen re menjëherë:
Benfika, kryesuese e kampionatit të saj, ndërsa Bryzhi është në krizë prej muajsh në Belgjikë. Dhe kështu skuadra e Roxher Shmidit luan një ndeshje që e kontrollon dhe në pjesën e dytë bën edhe dy goditjet fituese: fillimisht me një penallti të transformuar në gol nga Zhoao Mario (faull i Hendrit ndaj Gonçalo Ramosit) dhe në fund një gabim i Meijerit, i hap rrugën golit të dytë të David Neresit, i cili në minutat e fundit shikon edhe një gol të anuluar për pozicion jashtë loje.