Alegri: Liga e Europës, bileta e Champions-it

Për Masimiliano Alegrin do të jetë një debutim në Ligën e Europës, edhe pse eliminimi nga Championsi i djeg ende shumë. Gjithsesi, realiteti i Juventusit sivjet është si një det i trazuar, me dallgë që ngrihen nga hiçi dhe kërkojnë shumë dëme, prandaj si një "kapiten anijeje", libornezi e di se cili është shpëtimi: "Duhet t'i shkojmë deri në fund Ligës së Europës, pasi vetëm kështu kemi mundësinë që të rikthehemi në Champions. Është e thjeshtë, pastaj të bën mirë që mes javëve të kampionatit të rrish në shtëpi në divan, bëhet e mërzitshme. Prandaj, të mbledhim forcat dhe të nisim të sillemi si një skuadër e madhe, duke nisur nga Nantë e në vazhdim". 55-vjeçari pranon se lëkundjet pas penalizimit me 15 pikë janë ende të forta, por ai ka frikë se mund të ketë edhe të tjera. "Unë nuk jam lider, por trajner, ndonëse klubi ka qenë shumë i zoti që të ruajë balancat dhe është gati për betejën e tij, ndërsa ne për tonën. Një skuadre që i hiqen 15 pikë nga mëngjesi në darkë, tronditet dhe ajo që morëm nga Monza ishte përgjigjja e situatës sonë psikologjike. Gjithsesi, unë

mendoj se e kemi marrë veten dhe tani e në vazhdim na duhen hapa të sigurt për të ecur përpara, pasi kundrejt nesh ka nisur një sulm dashakeq, nga i cili mund të ketë ende surpriza. Prandaj, nëse duam që të ndihmojmë veten dhe skuadrën, të kualifikohemi përballë Nantës.

Nuk e di nëse jemi favoritë, apo nëse Nantë nuk është një ekip i madh. Këtë do ta mësojmë në fushë, ndonëse ne duhet të kemi gjithmonë respekt për rivalët dhe aq më tepër për Nantën. Madje, mësova se njërit prej lojtarëve të tyre i ka ndodhur një fatkeqësi e madhe

dhe nëse do të jetë i pranishëm, do t'i jap një përqafim Ganagosë. Tredhëmbëshi dhe Pogba? Të shohim, do të vendos në stërvitjen e fundit. Ndërkohë, Pogba nuk do të jetë, por me ne do të udhëtojë Bonuçi dhe ndoshta mund të ketë ndonjë minutë për të".