Bylisi humbet sulmuesin, dëmtohet rëndë Felipe Soza
Ballshiotët duket se këtë sezon do të vijojnë që të vuajnë dëmtimet e rënda të lojtarëve. Krahas sulmuesit nigerian, Antoni Beji, që ka pësuar një dëmtim pak kohë më parë, situata do të vijojë të jetë problematike në repartin e avancuar me lojtarët titullarë. Infermierisë i është shtuar së fundmi edhe braziliani Felipe Soza. Ai u dëmtua në ndeshjen e fundit në Laç, duke lënë fushën para kohe. Mësohet se nga ekzaminimet paraprake bëhet fjalë për një dëmtim të rëndë në gju dhe riaftësimi mund të kërkojë shumë kohë. Mirëpo, klubi për të qenë i sigurt, do t’u bëjë në ditët në vijim një kontroll të specializuar lojtarëve në një prej klinikave në vendin tonë. Ndërkohë, dje vetë braziliani në një postim në profilin e tij në “Instagram” ka dhënë lajmin për dëmtimin e rëndë që ka pësuar në Laç. Në Ballsh shpresojnë që Felipe Soza të kthehet shpejt në fushë, duke qenë se është faza kulminante e garës dhe bëhet fjalë për një lojtar shumë të rëndësishëm në fazën ofensive. Në të tilla kushte, pas Antonit dhe Felipe Sozës shkon në dy numri i sulmuesve që mbesin jashtë dhe krijojnë jo boshllëk të madh në një repart ku Bylisi ka pasur vështirësi në gjetjen e golit. Mallakastriotët janë ndër ekipet që prodhojnë lojë dhe raste, por ashtu sikurse edhe shpërdorojnë shumë. Felipe Soza ka qenë ndër lojtarët më në formë javët e fundit dhe stafi teknik ishte shumë i kënaqur me rendimentin e tij, edhe pse nuk ka qenë shumë efikas në rastet që i janë paraqitur. Gjithsesi, pritet që deri në fundjavë të ketë të tjera rezultate rreth ekzaminimeve që klubi po ndjek për sulmuesin që u bë pjesë e mallakastriotëve në verën e shkuar. Tashmë në ofensivën ballshiote mbeten Luis Kaçorri dhe Eridon Qardaku, por edhe Xhonatan Lajthia si sulmues krahu. Pa harruar edhe brazilianin Zho Santos, të ardhur në merkaton e janarit.