Shkëlqen Teuta, leksion Tiranës në “Air Albania”

Tragjedi dhe mrekulli në "Air Albania". Tirana mundet në ditën kur duhet të arratiset nga vendi i dytë, ndërsa Teuta i bashkëngjitet skuadrave të Europës. Ky është verdikti i javës së 23të të Superiores. Një ndeshje e madhe e durrsakëve brenda në kryeqytet, që jo vetëm fitojnë, por tani risin edhe pretendimet për objektivat që kanë.

NDESHJA - Takimi nis me një rast të madh të Tiranës. Minuta e 4-t. Kros i Haxhiut në qendër, Hila në shtyllën e dytë godet, topi largohet nga vija fatale prej Kotobellit. Në minutën e 10-të ndryshon rrjedha e ndeshjes. Goditje dënimi për Teutën. Ekzekuton Kallaku, kthen muri, topi shkon tek E. Vila që gjuan menjëherë dhe gol. 0-1 për durrsakët. Tirana reagon. Në të 21-ën, Patrik gjuan nga jashtë zonë, grushton Qirko. Topi shkon te Hila, që edhe pse me portën bosh godet çuditërisht jashtë. Teuta kërkon kundërsulmin dhe e bën kur mundet. Minuta e 38-të penallti për Teutën. Top në thellësi për Grudën, Najdovski e godet te këmbët dhe Meta akordon penallti. Penalltia konfirmohet nga VAR-I. Ekzekuton Kallaku, por pret Bekaj, që shpëton rezultatin. Një pjesë e parë e fortë me durrsakët që shënojnë dhe kanë mundësi golash, ndërsa Tirana shfryn, por nuk bën dot gjë në fushën e lojës. Pjesa e dytë nis me Tiranën në sulm. Në minutën e 47-të Hasani provon nga jashtë zonë, pret Qirko. Sërish pesë minuta më vonë gjuajtje e Lushkjes nga jashtë zone, por grushton Qirko. Loja duket se ndryshon për mirë për bardheblutë, pasi në të 73-ën Gruda ndal një aksion dhe ndëshkohet me të verdhë i dyti për të dhe Teuta duhet të luajë për 15 minuat me një lojtar më pak. Gjithsesi, inferioriteti numerik nuk është se ndikon te durrsakët, që në minutën e 79-të dyfishojnë shifrat dhe hipotekojnë fitore. Aksion perfekt me Dacin që mban topin. Pason te Kallaku që galopon në fushë, pason tek E. Vila majtas, vetëm me Bekajn çon topin në rrjetë. Gjithë Teuta në fushën e lojës për të festuar golin e fitores. Minutat e tjera janë vetëm luftë e ftohtë e bardhbluve për të shënuar, por që nuk ia dalin. Kampionët kanë pretendime dhe për ndonjë penallti të mundshme, por nuk ka asnjë mundësi. Madje, durrsakëve u anulohet një tjetër gol për pozicion të parregullt. Përfundimisht, Teuta, merr fitoren e dytë me Tiranën, pas asaj të fazës së dytë. Kthehet në Durrës me tri pikë, duke bllokuar arratisjen e kampionëve. Vetë ngjitet në një pozitë më të mirë në renditje.