Egnatia për historinë në Kupë, kërkohet gjysmëfinalja e parë

Rrogozhinasit ia kanë marrë dorën Laçit, tri fitore në këtë sezon

Pozita komode në kampionat dhe vetëm një hap larg pretendenteve për titull, Egnatia duket se ka rritur ambiciet edhe për edicionin e 71-të të Kupës së Shqipërisë. Nesër në orën 13:00 rrogozhinasit presin për fazën çerekfinale, vizitën e Laçit. Një skuadër së cilës këtë sezon ia kanë rrëmbyer pikët e plota me tri fitore të arritura ndaj tyre. Sikurse sezonin e kaluar, kur në çerekfinale Egnatia ka pasur përballë po Laçin dhe pati shumë ekuilibër nga ndeshjet e luajtura, 1-1 në Rrogozhinë dhe 0-0 në Laç, teksa eliminimi erdhi vetëm prej goditjeve të penalltive, që nuk ua mundësuan rrogozhinasve shkuarjen në gjysmëfinale. Tani Egnatia duket se e ka radhën që ta kapërcejë turin. Njëzëri, drejtuesit e futbollistët kanë konfirmuar që këtë objektiv të rëndësishëm për kalimin e turit, do ta bëjnë realitet në këtë edicion. OPTIMIZËM- Pas fitores së merituar dhe me përmbysje që Egnatia realizoi në transfertë ndaj Bylisit me shifrat 2-3, rrogozhinasit në dy sfidat, fillimisht në “Egnatia Arena”, janë të vendosur të luajnë denjësisht rolin e sfidantit karshi kurbinasve duke kërkuar të lënë shenjë në histori dhe duke prekur për herë të parë gjysmëfinalen e Kupës. Optimizmi ndihet kudo. Duke qenë se ndeshja me Laçin luhet nesër dhe ditët për ta përgatitur këtë takim të parë të Kupës ishin të shkurtra, ekipi i Edlir Tetovës nuk ka bërë pushim gjatë kësaj fundjave, por me shumë entuziazëm ka dalë në stërvitje. Atmosfera ka qenë shumë pozitive, si në radhët e futbollistëve, ashtu dhe të drejtuesve. Hapi i parë pozitiv mendohet të realizohet që nga ndeshja e parë, për të siguruar një rezultat sa më të favorshëm. Të gjithë lojtarët janë në gjendje të mirë. Nuk ka asnjë dëmtim dhe pritet të zbresë në fushë një formacion i plotë nesër me Laçin.