Plas në Gramsh, grushte arbitrit
Protagonistë të dhunës, presidenti i klubit Andrit Bici dhe babai i tij ish-kryebashkiak
Ndeshja u ndërpre pas penalltisë së akorduar për Valbonën nga gjyqtari Anxhi Lushi
Rikthehet dhuna në ndeshjet e Kategorisë së Dytë. Të shtunën në stadiumin “Myslim Koçi” të qytetit të Gramshit është goditur arbitri i kolegjiumit të Tiranës, Anxhi Lushi, ndërsa ndeshja nuk ka vazhduar pas minutës së 70-të, duke u bërë tashmë objekt i shqyrtimit nga Komisioni i Disiplinës në FSHF. Pas një pjese të parë të ekuilibruar mes Gramshit dhe Valbonës, situata ka degraduar në fraksionin e dytë. Fillimisht pati tension kur shënuan tropojanët në minutën e 7-të me autor Pajën. Vendësit pretenduan për pozicion jashtë loje, por anësori Ahmeti nuk ishte i këtij mendimi. Gramshi barazoi në minutën e 22-të me lojtarin e huaj, Xhon Aleksandër, ndërsa skuadrat shkuan në dhomat e zhveshjes me rezultatin 1-1. Pas fillimit të pjesës së dytë, duhet të vinte minuta e 68-të që të ndryshonte gjithë ndeshjen. Një top i harkuar në zonën e Gramshit, bën që të ketë një devijim pas duelit mes dy lojtarëve. Gramshi pretendon për faull të futbollistit tropojan, ndërsa arbitri akordon penallti për Valbonën për prekje të topit me dorë nga Topalli. Këtu precipiton gjithçka, pasi te Gramshi kundërshtojnë ashpër vendimin e gjyqtarit Lushi, i cili është i vendosur. Stafi i Gramshit futet në fushë, ndërsa kur mendohej se do të bëhej gati goditja e 11-metërshit nga tropojanët, në fushë futet presidenti Andri Bici, bashkë me ish-kryebashkiakun e Gramshit,
Dritan Bici. I pari goditi direkt arbitrin, në një kohë që ata pak policë, të cilët ishin aty ndërhynë. Ndeshja u ndërpre menjëherë nga gjyqtari dhe pas disa minutash kaos, forcat e rendit morën situatën në kontroll, duke shpëtuar treshen e gjyqtarëve nga një dhunë më e egër. Arbitri
Lushi vendos që të mos kthehet më në fushë bashkë me asistentët, duke mbyllur kështu takimin Gramshi-valbona pas 70 minutash lojë për shkaqe sigurie. Penalltia e fituar nga ekipi i Valbonës nuk u ekzekutua. POLICIA
Pas incidentit, policia bëri të ditur se janë proceduar penalisht autorët. “Shtetasi A. B., 24 vjeç, president i klubit të Gramshit, ka goditur me grusht shtetasin A. L., 25 vjeç, banues në Tiranë, arbitër i ndeshjes. Menjëherë shërbimet e Komisariatit të Policisë Gramsh dhe shërbimet e Forcës së Posaçme ‘Shqiponja’ të DVP Elbasan, kanë
ndërhyrë në stadium duke parandaluar përshkallëzimin e konfliktit dhe kanë shoqëruar shtetasin A. B., në ambientet e Komisariatit të Policisë Gramsh. Në vijim të veprimeve, oficerët e Policisë Gjyqësore të Prokurorisë referuan materialet në Prokurori dhe nisi procedimi penal për shtetasit A. B., 24 vjeç dhe D. B., 58 vjeç, banues në Gramsh (babë e bir); A. B., për veprat penale ‘Goditja e sportistit, trajnerit, arbitrit’ dhe ‘Mosbindja ndaj urdhrit të Policisë’. Shtetasi D. B. ka kundërshtuar punonjësit e Policisë gjatë shoqërimit të djalit të tij”, citohej në komunikatën e policisë.