Tirana thyen Teutën, Besëlidhja leksion Apolonisë për kreun
Lezhjanët e Afrim Bilalit tregojnë forcën në transfertë
Bardheblutë, super kundër kampionëve
Superliga e basketbol lit të meshkujve ka kompletuar të shtunën ndeshjet e javës së 13-të të kampionatit. Tirana ka marrë një fitore të bukur në shtëpi përballë Teutës, ndërsa Besëlidhja mundi në transfertë Apoloninë, duke iu bashkuar në krye të renditjes durrsakëve.
TIRANA-TEUTA – Sa herë përballen mes tyre bardheblutë dhe bregdetarët, rivaliteti në parket është i garantuar. Kështu ndodhi edhe në sfidën e radhës në sallën “Farie Hoti”. Këtë herë ishte Tirana që doli triumfuese në shifrat 80-74, duke i shkaktuar disfatën e tretë në kampionat Teutës. Një ndeshje që në pjesën e parë ishte disi më e mirë për miqtë, ndërsa në të dytën bardheblutë e Erkand Karajit kthyen gjithçka në favor të tyre për ta mbyllur me festë para tifozëve kryeqytetas. Takimi nisi me gabime të shumta nga të dyja kampet, ndërsa për të parë koshin e parë u deshën më shumë se dy minuta lojë, me Hysenagollin që u tregua i saktë poshtë tabelës, duke realizuar 2 pikët e para për Tiranën. Rendimenti në sulm vijoi të ishte i ulët edhe në minutat në vazhdim, me skuadrat që nisën ta korrigjonin shënjestrën vetëm në çastet e fundit të 10-minutëshit të parë, periodë kjo që u mbyll 15-17 në favor të bregdetarëve. Edhe në çerekun e dytë Teuta pati një epërsi të lehtë, për të fituar 19-21, duke kryesuar
34-38 në përfundim të pjesës së parë. Tirana ndryshon ritëm me rikthimin në parket. Bardheblutë luajnë më mirë në të dyja fazat, si në mbrojtje gjithashtu edhe në sulm, për ta fituar periodën e tretë 21-15, duke përmbysur në 55-53 pas 30 minutash. Perioda e fundit vijon me rivalitet
të lartë, ndërsa të dyja skuadrat janë të ngarkuara me shumë lojtarë me nga 4 personale, me Hysenagollin për Tiranën dhe Sullivan për Teutën, që e mbyllin para kohe sfidën. Kryeqytetasit i menaxhojnë më mirë minutat e fundit dhe mbrojnë avantazhin, për ta mbyllur takimin me +6 pikë. Pesë lojtarë të Tiranës prekën kuotë dyshifrore pikësh, ndërsa rendimentin më të lartë e pati dyshja e zakonshme, Julian Hamati (20 pikë, 6 ribaunde, 6 asiste) dhe Endit Hysenagolli (10 pikë, 13 ribaunde). Për Teutën shënuesi më i mirë ishte Sullivan, autor i 16 pikëve.
APOLONIA-BESËLIDHJA – Asnjë problem për skuadrën lezhjane, që arriti ta kalonte me sukses transfertën në Vlorë kundër skuadrës së Apolonisë. Besëlidhja komandoi në parket, duke shkuar madje deri në +35 pikë avantazh, për ta fituar më pas ndeshjen me rezultatin 68-90. Të besuarit e trajnerit Afrim Bilali e nisën vrullshëm, teksa triumfuan 11-24 në periodën e parë. Edhe çereku i dytë foli për miqtë nga veriu, të cilët fituan 17-23 dhe shkuan në pushim me avantazhin e përgjithshëm 28-47. Besëlidhja dominoi totalisht edhe në periodën e tretë, ku fitoi thellë 13-28, duke udhëhequr 41-75 pas tre 30 minutash lojë. Në 10minutëshin e fundit lezhjanët e ulën ritmin, ndërsa fierakët e ngushtuan disi diferencën e pikëve, periodë që u mbyll 2715 për vendësit, por në shifra të përgjithshme suksesi i Besëlidhjes ishte i “salduar” me +22 pikë. Me 23 pikë të realizuara, Morris ishte shënuesi më i mirë në radhët e Besëlidhjes. Ndërsa për Apoloninë nuk mjaftoi i zakonshmi Whitfield, autor i 24 pikëve. Kujtojmë se të premten në sfidën hapëse të javës së 13-të, Kamza mundi Vlazninë me rezultatin 94-81.