Fitore të thella për Tiranën, Flamurtarin dhe Partizanin
Basketbolli i femrave të shtunën dhe të dielën zhvilloi ndeshjet e javës së 12-të të kampionatit. Një javë që nuk dhuroi surpriza, teksa Flamurtari, Tirana dhe Partizani shënuan fitore të thella.
FLAMURTARI-ELBASANI – Skuadra vlonjate vijon ecurinë perfekte në kampionat, ndërsa, ashtu sikurse pritej nuk e kishte aspak të vështirë në shtëpi kundër Elbasanit. Flamurtari triumfoi me rezultatin 80-57 (17-13, 24-11, 19-16, 20-17) në një takim të dominuar nga fillimi e deri në fund ndaj vajzave nga Elbasani. Kualiteti më i lartë i kampioneve në fuqi bëri diferencën ndaj një skuadre të re në moshë si Elbasani. Kjo ishte fitorja e dhjetë në po kaq takime të zhvilluara në kampionat për bregdetaret, të cilat mbeten në vend të parë. Ndërsa Elbasani qëndron në vend të parafundit, me dhjetë humbje dhe vetëm një fitore. Për sa u përket paraqitjeve individuale, Analyss Benally me 18 pikë si dhe Liliane Ndongbwo me 14 pikë e 13 ribaunde, ishin më të mirat për ekipin vlonjat. Tek Elbasani dopioshifër pikësh arritën vetëm Xhemile Ahmetaj dhe Rexhina Hasa, me nga 10 pikë secila.
TIRANA-VLLAZNIA – Vajzat bardheblu morën suksesin e radhës në shtëpi, këtë herë përballë Vllaznisë me rezultatin e thellë 92-58 (26-10, 2715, 15-18, 24-15). Takimi i zhvilluar të shtunën në “Farie Hoti” u dominua nga Tirana, sfidë ku trajnerja Mirza Alibegaj u dha shumë minuta edhe lojtareve të stolit. Nga ana tjetër Vllaznia, skuadër që sheh çdo vit t’i largohen lojtare të talentuara, e kishte të vështirë t’i përgjigjej nivelit të kryeqytetaseve. Klea Verri me 22 pikë, Enisa Qosja me 18 dhe Aida Palko me 13 ishin pikëshënueset më të mira në fitoren e Tiranës. Ndërsa te shkodranet rendimentin më të lartë e kishin Anisa Bokrina dhe Medina Hykaj me nga 16 pikë secila, si dhe kapitenia Ingrit Dashja me 15 pikë.
PARTIZANI-BARLETI – Java e 12-të u kompletua me ndeshjen e djeshme në “Asllan Rusi” ndërmjet Partizanit dhe Barletit. Një takim pa shumë histori për shkak të diferencave të jashtëzakonshme ndërmjet dy ekipeve. Partizani e ktheu këtë sfidë me tepër në një seancë stërvitore, duke fituar në shifrat 108-28 (33-8, 25-5, 308, 20-70). Të kuqet, të cilat ditët e fundit janë përforcuar edhe me dy lojtare të tjera nga tjera Shtetet e Bashkuara të Amerikës, bënë çfarë deshën në parket përballë vajzave të reja të ekipit universitar. Lasonja Edwards u prezantua si shënuesja më e mirë e ndeshjes në debutimin e saj te Partizani, duke realizuar 21 pikë. Për Barletin, e vetmja në dopioshifër pikësh ishte Neda Uka, autore e 11 pikëve.
E.SIKA/A.DUSHKU/N.GOCI