Interi bie sërish, Bolonja kthehet në makth
Zikaltrit pa grintë, një gol i Orsolinit vendos sfidën
Tjetër disfatë në transfertën e “Dall’ara”-s, -18 pikë nga kreu
Ashtu si një sezon më parë, kur ajo humbje në Bolonjë u kushtoi në fund titullin kampion, edhe këtë sezon disfata e “Dall’ara”-s zhyti edhe një herë shpresat e zikaltërve për titullin. Goli i Orsolinit në të 76’-ën mjaftoi për të detyruar Interin të largohet pa pikë nga Bolonja dhe për ta dërguar në -18 pikë distancën me kryesuesit e Napolit. Skuadra e Inzagit zbriti në fushë jo vetëm me disa ndryshime në formacion nga mbrëmja e Champions-it, por edhe me një tjetër qasje. Ritmi dhe intensiteti i ulët i zikaltërve që në minutat e para të lojës, pasojë edhe e një Bolonjë agresive e zhvendosën në gjysmëfushën mike lojën, ndërkohë që në zonën e Onanës ndodhi gjithçka në 15 minutat e para. Tiago Mota pretendoi një penallti pas një prekjeje me dorë të Darmianit dhe pak minuta më vonë festoi për një gol të shënuar nga Barrou. Ndërhyrja e VAR-IT ama e konsideroi të parregullt rrjetën e sulmuesit për një pozicion jashtë loje të Domingezit, që ndikoi në aksion. Zikaltrit u përgjigjën me një goditje të Lukakut, që u devijua në goditje këndi, por ishin përsëri kuqeblutë që u shfaqën më të rrjedhshëm dhe më konkretë në manovër. Kambiazo gjeti Onanën dhe më vonë Satriano traversën, duke e detyruar Inzagin të provojë të ngrejë bariqendrën. Darmiani e Bastoni bëhen pjesë e ofensivës dhe përpjekjet paguhen me aksionet e Mikhitarianit, Lautaros e më pas Çalhanoglusë, që gjithsesi nuk janë të rrezikshëm dhe e mbyllin pjesën e parë në barazim.
AVANTAZHI - Në të dytën, Interi i gëzohet një Lukaku më në formë, që në bashkëpunim me Gosensin krijojnë për Çalhanoglunë, i cili gjithsesi nuk shënon. Soriano dhe Domingez nuk dorëzohen në krahun tjetër, me sfidën që ka një ritëm më të shtuar. Zikaltrit janë më imponues se në pjesën e parë dhe përpiqen të diktojnë ndeshjen, duke përfituar edhe nga Bolonja disi më e tërhequr. Vendasit përfitojnë nga Skorupski në formë fantastike që ndal një herë Lukakun, më pas Gosensin dhe pak minuta më vonë edhe Xhekon, që mori vendin e belgut. Edhe Çalhanolgu gabon një rast flagrant, ndërkohë që kur u duk se aktivizimi i Barelës po i jepte një tjetër formë Interit dhe ndeshjes, zikaltrit u ndëshkuan. Një pasim i nisur nga D’ambrozio në drejtim të mesfushorit italian, gjen Shuten që dërgon një krosim të gjatë për
Orsolinin, i cili me një goditje brenda zonës mposht Onanën dhe dërgon topin në rrjetë në të 76’-ën. Në 15 minutat e ngelura, skuadra e Inzagit nuk arriti të bënte dot asgjë për të barazuar shifrat, duke u dorëzuar edhe një herë përballë një kundërshtari të lehtë në letër.