Flamurtari, në krye pas 35 ditësh
Juri, Beqja dhe një autogol mjaftojnë për pikët. Verdhejeshilët mbeten në zonën e rënies
Kuqezinjtë rimarrin “komandën” e Kategorisë së Parë, nuk e kursejnë aspak Lushnjën
Flamurtari rimerr “komandën” pas 35 ditësh. Fitorja 3-0 me Lushnjën dhe ndalesa e Skënderbeut, i dhanë vendin e parë në klasifikim. Me Flores si kapiten dhe me skemën 4-3-3, kuqezinjtë e Marcelo Troisit kanë arkivuar një trepikësh të rëndësishëm për objektivin madhor. Verdhejeshilët erdhën për pikë, por dolën thatë dhe rrezikojnë gjithnjë e më shumë rënien.
PJESA E PARË
Takimi nis me një gol të shpejtë. Do të ishte minuta e tretë, kur Fernando kombinohet me Jurin dhe ky i fundit nuk fal me të djathtën. Lushnja nuk pajtohet me rezultatin, por i mungon forca e duhur. Është Levendi që provon me një gjuajtje me kokë, por Kuka e ndal pa problem. Në minutën e 23të, ka një tjetër rast të mirë për Flamurtarin. Juri gjuan në zonën e rreptësisë, duke shërbyer për Auguston, por rrëshqet. Miqtë përgjigjen dy herë me Samaken, barazimi nuk duket. Pas disa tentativash, në të 43-ën vjen goli i dytë. As fati nuk është me verdhejeshilët. Basha devijon një krosim të Flores, duke shkaktuar autogol. Nuk e fsheh gëzimin Marcelo Troisi që duartroket, në një kohë që vlonjatët shkojnë të qetë në pushim.
PJESA E DYTË Vlonjatët vijojnë kundërsulmet edhe në këtë pjesë, por pa pasur mundësi reale shënimi. Në të 67-ën është Magani që mundohet të “gatuajë” diçka, por largon
Shkalla. Shkon jashtë edhe një tentativë e Nurit, i futur në lojë në këtë fraksion loje. Atë që nuk e bën dot Lushnja, Flamurtari e realizon lehtësisht pas tre minutash. Pas një aksioni personal,
Beqja vendoset përballë Kaloshit dhe e ndëshkon për 3-0. Mbrojtësi feston duke ia dedikuar golin djalit të sapoardhur në jetë. Në tri minutat shtesë Doksani ka mundësinë të shënojë një eurogol, kur shkakton të majtë nga distanca, por gjuajtja shkon jashtë. Me këtë fitore, Flamurtari shkon në krye të tabelës së klasifikimit, me një pikë më shumë se Dinamo dhe Skënderbeu. Kjo e bën luftën për ngjitjen edhe më të ashpër. Lushnja zbret në vendin e parafundit të klasifikimit, duke e bërë malore mbijetesën.