Egnatia “nevrike”, kartonët bëhen problem
Prej barazimit 0-0 në ndeshjen e parë çerekfinale, por edhe prej humbjes më të fundit në kampionat 2-1 ndaj Erzenit, tek Egnatia nuk kanë kohë të merren me asgjë tjetër, përveçse t’i kushtojnë tërë vëmendjen e duhur përgatitjes me seriozitet e përgjegjshmëri ndeshjes së kësaj të mërkure për Kupën. Sa për kujtesë edhe në edicionin e kaluar barazimi 1-1 në Rrogozhinë në ndeshjen e parë nuk e kishte penguar Egnatian të luante bukur e të synonte kualifikimin në takimin e kthimit në Laç, ku koha 90-minutëshe bashkë me dy shtesat 2x15’ qenë mbyllur 0-0 dhe vetëm nga rezultati i gjuajtjeve nga 11-metërshi të mbyllura 3-2 për Laçin, Egnatia nuk arriti të bënte të mundur ëndrrën e shkuarjes për herë të parë në gjysmëfinale. Ky objektiv mbetet i njëjtë tashmë për rrogozhinasit. KARTONËT – Janë 29 të verdhë dhe 2 të kuq vetëm në 7 javë të fazës së tretë që ngrenë tek Egnatia
“alarmin” mbi numrin rekord tashmë të ndëshkimeve për këtë sezon. Jo vetëm për futbollistët, por në listë janë edhe drejtues të stafit teknik që janë “fshikulluar” nga arbitrat. Në 25 javët e deritanishme të kampionatit janë në total 73 kartonë të verdhë dhe 4 të kuq, që tregojnë se skuadra rrogozhinase në mënyrë krejt të habitshme, duke e njohur të gjithë stilin e lojës së saj teknike dhe jo agresive në fushë, nuk ka ditur të kontrollojë si duhet nervat në fushën e lojës, por dhe jashtë perimetrit të saj. Të vjen keq që pjesa më e
madhe e këtyre kartonëve janë marrë në mënyrën më naive, për protesta krejt të kota, e pa asnjë shkak. Tetë kartonët e verdhë dhe një i kuq në takimin e fundit humbur me Erzenin, jo vetëm te ndeshja e kthimit çerekfinale e Kupës të mërkurën ndaj Laçit, por edhe te
takimi i javës së 26-të të kampionatit në “Arena Egnatia” këtë fundjavë ndaj Teutës, mund të kenë ndikimet e tyre. Pikërisht pra nga mungesat që vijnë prej skualifikimeve me kartonë, që e thënë troç: i kanë kaluar madje limitet e mundshme të tyre. FATMIR EFICA