Tetova: Egnatia për kualifikim, jemi gati të shkruajmë historinë

Musta pritet të mungojë, trajneri beson te shkëlqimi i Duamenes & CO

Trajneri i Egnatias, Edlir Tetova, beson se sot skuadra e tij do të bëjë historinë, duke u kualifikuar për herë të parë në turin gjysmëfinal të Kupës së Shqipërisë. Në një intervistë për “Panorama Sport”, Tetova tregoi ambiciet e skuadrës së tij për ndeshjen e sotme në Laç, që do të luhet në orën 13:00. Rezultati 0-0 në sfidën e parë në Rrogozhinë ka lënë gjithçka të hapur për kualifikimin.

Edlir, barazimi 0-0 në ndeshjen e parë sa shanse ju jep për kualifikimin në Laç?

Duke qenë se ndeshja e parë është mbyllur me barazim, ne do të guxojmë dhe do të luajmë të gjitha shanset tona për të kaluar në gjysmëfinale. Gjithçka mendoj se është e hapur. Ndërsa një motivim plus janë tri ndeshjet e fituara në kampionat, dy herë në Laç dhe një ndeshje në Rrogozhinë.

Edhe në edicionin e kaluar

dy skuadrat u përballën në këtë tur dhe gjithçka u nda nga penalltitë. Jeni përgatitur për 11-metërsha apo mendoni se mund ta zgjidhni për 90 minuta?

Për një kualifikim të mundshëm ne kemi bërë të gjithë përgatitjet. Do të dëshiroja çdo formë, si gjatë 90 minutave, shtesave apo edhe penalltive. Mjafton që ne të kalojmë turin, sepse do të ishte i pari sukses në historinë e Egnatias.

Humbja në Durrës me Erzenin ku ju mbetët i pakënaqur edhe me lojën, sa e ka ndërgjegjësuar ekipin dhe çfarë mund të ndryshoni? Koha e shkurtër në dispozicion nuk na jep mundësi të ndryshojmë shumë gjëra. Por, diçka e kemi të qartë se si duhet të jemi më të fortë, më këmbëngulës

dhe mbi të gjitha më efikasë.

Në kampionat vuani shumë kartonët, por tashmë si është situata para ndeshjes në Laç?

Kemi shumë të ndëshkuar, por me organikën e futbollistëve nuk është se rrezikojmë. Përveç Mustës që në 2-3 ditët e fundit ka shfaqur probleme shëndetësore, të gjithë lojtarët e tjerë i kemi të gatshëm për takimin e sotëm ndaj Laçit.

Ngjeshja e kalendarit ndihet te futbollistët apo nuk do të ndikojë në këtë momente?

Kjo ngjeshje e ndeshjeve mendoj se na bën më të fortë. Na jep mundësi të shpërndajmë minuta më shumë edhe te disa futbollistë që kanë luajtur më pak.

Sulmuesi Duamena po shënon rregullisht, besoni se në Laç ai dhe lojtarët e tjerë të këtij reparti do të bëjnë diferencën?

Rafael ka vënë gjithçka në funksion të ekipit dhe këtë e tregojnë më së miri edhe golat e shënuar. Kam besim se Duamena se do të shfaqë edhe më shumë potencial. Edhe lojtarët e tjerë cilësorë që ne kemi, pres në fakt të bëjnë të njëjtën gjë si ai. FATMIR EFICA