Partizani super, fiton Ligën Unike
Trajnerja Eliverta Bujari: E merituam! Bravo vajzave, por nuk ndalemi këtu...
BASKET FEMRA/ Të kuqet tronditin Flamurtarin, festojnë me trofeun në Vlorë
Partizani feston në Vlorë. Kryeqyteta set e drejtuara nga trajnerja Eliverta Bujari janë fitueset Ligës Unike për sezonin 2022-2023 në basketbollin e femrave. Të kuqet zhvilluan një finale fantastike duke mundur Flamurtarin me rezultatin 61-72 për të ngritur lart trofeun mbarëkombëtar. Ndonëse luanin në fushë kundërshtare, në një pallat sporti të mbushur nga publiku vendës, vajzat e Partizanit ruajtën qetësinë për ta komanduar finalen thuajse nga fillimi e deri në fund. Një ndeshje me rivalitet, që dhuroi edhe spektakël për të pranishmit e shumtë, duke qenë një reklamë mjaft e mirë e basketbollit. Të dyja ekipet e startuan lojën me nga 4 lojtare të huaja në formacion, teksa Ornela Lalaj për Partizanin dhe Artemida Myrto për Flamurtarin plotësonin pesëshet, ndërsa Tea Memushi e filloi nga stoli pas dëmtimit në gjysmëfinale. Vlonjatet e nisën lojën me entuziazëm, duke marrë një kryesim të lehtë në minutat e para, por gradualisht Partizani nisi të dominojë në parket, për ta fituar periodën e parë 13-17. Në çerekun e dytë ekipet kanë rendiment më të lartë në sulm, por janë sërish kryeqytetaset që tregohen më të sakta, duke triumfuar 2025 për të shkuar në pushimin ndërmjet dy pjesëve me epërsinë e përgjithshme 33-42. Në periodën e tretë bie disi ritmi, por Partizani e ka nën kontroll lojën, duke e fituar edhe këtë fraksion 10-14, për të kryesuar 43-56 pas 30 minutash lojë. Me gjithë përpjekjet e skuadrës së trajneres Elona Hasanaj në periodën e katërt, të kuqet e menaxhojnë avantazhin në mënyrën më të mirë, ndërsa në kampin vlonjat kanë pretendime për arbitrimin. Më pas vjen edhe sirena përfundimtare, që i lë vend festës së shfrenuar dhe të merituar të vajzave të Partizanit. Ndërsa amerikania Lasonja Edwards dhuroi shou me një kërcim “hot”.
CEREMONIA – Në fund u zhvillua edhe ceremonia e rastit, e dorëzimit të Kupës dhe medaljeve. Fillimisht kryetari i Bashkisë së Vlorës, Dritan Leli, u dorëzoi trofeun e nënkampioneve të Ligës Unike, skuadrës së Flamurtarit. Ndërsa presidenti i Federatës Shqiptare të Basketbollit, Avni Ponari, kreu i Federatës së Basketbollit të Kosovës, Arben Fetahu dhe kreu i KOKSH Fidel Ylli, i dorëzuan trofeun e Ligës Unike, kapitenes së Partizanit, Ornela Lalajt. Ndërkaq, titulli “Mirënjohje”, iu dha
drejtorit të Klubit Shumësportësh Flamurtari, Klevis Kaso, për organizimin e këtij aktiviteti në Vlorë. “Mirënjohje” edhe për trajneren Elona Hasanaj, dhe ish-basketbollistet Migena Plasa dhe Valbona Sako.
ELIVERTA BUJARI – Ndonëse është vetë në fillimet e karrierës si trajnere, Eliverta Bujari po regjistron rezultate të shkëlqyera. Që në vitin e parë në drejtim të Partizanit, Bujari lë gjurmë duke sjellë në muzeun e klubit një trofe të rëndësishëm si Liga Unike. Shumë e lumtur
për këtë arritje, pas finales trajnerja deklaroi: “Disa vite kam luajtur në këto fusha për të fituar kampionatin dhe Liga Unike na çliroi shumë. E kemi më se të merituar. E nisëm këtë Ligë me opinionin si vend i katërt. Ju kam thënë që ne nuk i trembemi asnjë skuadre dhe e merituam. Përgëzoj gjithë vajzat për punën e madhe që kanë bërë, pasi janë të palodhura. Partizani nuk do të ndalet këtu. E rëndësishme është që trofeu vjen në Shqipëri. Mos u mërzisni që nuk e fitoi Flamurtari”, përfundon trajnerja Bujari.