Interi, “gjueti” te Barcelona
Brozoviçi për Kesin dhe Zhordi Alba e Umtiti, ja çështjet e trajtuara nga homologët
Marota ka takuar Laportën në Portugali, merkatoja zikaltër kalon nga katalanasit
Merkatoja nuk fle kurrë, mbi të gjitha në këtë moment që sezoni po shkon drejt fundit dhe projektet për atë të ardhshmin kanë nisur. Ndër më vigjilentët janë gjithmonë drejtuesit e Interit, me Xhuzepe Marotën në krye që përpiqet të shfrytëzojë të gjitha mundësitë për të përforcuar skuadrën duke iu përmbajtur buxhetit të kufizuar. Lëvizja e parë ka ardhur të martën në Porto, aty ku sipas katalanases “Sport”, Marota dhe drejtori sportiv Auzilio kanë darkuar me presidentin e Barcelonës, Joan Laporta, dhe drejtorin sportiv, Mateu Alemani. Po siç raporton e përditshmja, në tryezën e bisedimeve mes drejtuesve kanë qenë të pranishëm katër emra: Brozoviç, Kesi, Alba dhe Umtiti.
SHKËMBIMI – Ideja që qarkullon prej kohës, ai për një shkëmbim të mundshëm mes mesfushorëve Frenk Kesi dhe Marselo Brozoviç ka qenë pika kryesore e bisedimeve. Kroati ndiqet prej kohësh nga Barça dhe nuk po kalon një moment të mirë në Milano, aty ku nga ana tjetër Kesi pëlqehet shumë. Ish-mesfushori i Milanit shikohet si përforcimi ideal për sezonin e ardhshëm për t’i shtuar më shumë muskuj dhe forcë repartit, me spanjollët që nuk pritet të bëjnë rezistencë për 26vjeçarin, edhe pse fjala e fundit do t’u takojë lojtarëve, që me dakordësinë e të dyja klubeve pritet të vendosin në fund të sezonit.
ALBA E UMTITI – Zhordi Albës i skadon kontrata me Barcelonën në qershorin e ardhshëm dhe në moshën 33vjeçare po konsideron një aventurë të re jashtë Spanjës dhe Interi nuk e ka kursyer interesin.
Në të majtë mungon një alternativë për Bastonin, me Dimarkon që nevojitet më i avancuar dhe eksperienca e spanjollit që mund të mbërrijë me një çmim të volitshëm, është një opsion i mirë për Interin. Në të njëjtën kohë, largimi i Shkriniarit, rinovimi i De Vrajit dhe blerja e Açerbit në pikëpyetje, detyrojnë zikaltrit të mendojnë për prapavijën, ku po konsiderohet Samuel Umtiti. Francezi, që aktualisht është i huazuar te Leçe dhe duke qenë se në verë nuk duket i mirëpritur sërish në Spanjë, mund të zgjedhë të vazhdojë karrierën në Itali.