Duel ferri në Lezhë, Gvozdenoviç pret një Skënderbe fitues
“Besëlidhja e ka jetike, s’duhet të kalojmë në panik”
Trajneri: Do të jetë e vështirë, por të mbajmë ritmin
Skënderbeu është gati për ndeshjen ndaj Be sëlidhjes në Lezhë dhe duket se i gjithë grupi është në dispozicion të trajnerit Ivan Gvozdenoviç. Një ndeshje që korçarët e duan të fituar me çdo kusht për të mbajtur vendin e parë në renditje dhe me shpresën se takimi i rivalëve direkt, Flamurtaridinamo, mund t’i japë mundësinë të thellojnë diferencën në krye. Për trajnerin Gvozdenoviç, e rëndësishme është që ekipi të ketë qetësinë psikologjike dhe të shmangë presionin për të dalë në lojën e vet. Këtë kreu i pankinës e ka pranuar edhe në prononcimin e dhënë për “Panorama Sport”, teksa pret një ndeshje të vështirë në Lezhë. “Vijmë nga një fitore dhe mbi të gjitha nga rezultate pozitive, duke shkuar me Besëlidhjen si kryesues të kampionatit. Na lind për detyrë të mbajmë këtë ritëm dhe të vijojmë kështu në të shtata ndeshjet e mbetura, duke nisur nga ky takim i kësaj jave. Besëlidhja është një ekip që meriton respekt dhe nuk duhet ta gjykojmë aspak nga renditja. Madje, kjo do të na duhet të na verë më shumë në alarm, pasi është një ekip që çdo pikë e ka jetike dhe do të kërkojë me çdo kusht të shpëtojë nga ai pozicion. Ne jemi të vetëdijshëm për këtë, ndaj edhe kemi punuar mjaft. Nga ndeshja e fundit me Tomorin kam pasur pakënaqësitë e mia dhe këtë ua kam shprehur lojtarëve. Janë të aftë të përballojnë ngarkesa psikologjike dhe duhet ta bëjnë. Kemi punuar shumë në këtë aspekt me secilin prej djemve, në mënyrë që mos të kalojmë në panik. Kjo ndodhi në 20 minutat e fundit në ndeshjen e kaluar, kështu që nuk duhet të përsëritet. E kemi përgatitur mirë këtë takim dhe do të shkojmë të bëjmë
maksimumin. Jemi të bindur në aftësitë tona ndaj dhe do të luajmë për tri pikët në Lezhë”, ka thënë fillimisht Gvozdenoviç, për t’u ndalur më pas te rikuperimet dhe dyshimet që për këtë takim. “Për fat të mirë, kemi rikuperuar dy lojtarë që na kushtëzuan disi në ndeshjen e fundit. Nikaj dhe Idrizaj, prej ditësh po punojnë me ekipin dhe i kanë kaluar problemet. Normalisht do t’i kemi në dispozicion. Në dilemë mbetet vetëm Moraesh, për të cilin do të vendoset para ndeshjes”, përfundoi trajneri i Skënderbeut, i cili shpreson të rikthejë korçarët në Superiore.