Spaleti: Milani është Champions-i, vetëm Maldini ka 5 trofe

“Kush e quan short pozitiv s’merr vesh nga futbolli”

Trajneri frenon entuziazmin për sfidat e Europës

Trajneri i Napolit, Luçiano Spaleti, ka komentuar shortin e Champions-it në mikrofonat e “Radio Kiss Kiss Napoli”. Skuadra napolitane peshkoi Milanin, një përballje e dyfishtë që do të zhvillohet në prill: “Ndeshja kundër Frankfurtit ishte e komplikuar sepse kur të gjithë thonë se e keni të fituar, krijohet tension i frikshëm pasi kualifikimi merret si i mirëqenë dhe çdo gjë ndërlikohet. Jemi të lumtur që kemi arritur deri këtu e çfarëdo që të vijë do të jetë e mirëpritur”. Nuk

mund të mungonte edhe një koment mbi rivalët e radhës në Europë, pasi shumë tifozë në Napoli e quajnë të kaluar edhe çerekfinalen. “Do të kisha preferuar të mos takohesha me italianët dhe vetëm ata që nuk e kuptojnë futbollin mund të thonë se Napoli pati

një short të mirë. Milani është Champions-i dhe vetëm Maldini ka fituar pesë herë këtë turne. Ditët e fundit kam lexuar që PSG-JA dhe Siti ndër vite kanë vuajtur për të arritur në fund, sepse u mungon tradita në këtë kompeticion”, vijoi deklaratën e tij Spaleti. Për intervistuesin, sidoqoftë, Napoli duket në anën më të lehtë të tabelës duke qenë se në tjetrën janë superfuqi të kontinentit në këto momente. “Inter, Milan e Benfika nuk duhen nënvlerësuar. Çdo gjykim duhet të jetë i ekuilibruar në një moment si ky. Milanin e njoh dhe

mendoj se është një skuadër që e ka kaluar momentin më të vështirë. Janë kampionë të Italisë në fuqi dhe më duket një skuadër në rritje konstante falë edhe zotësisë së trajnerit të saj”, ishte komenti i trajnerit të Napolit, që gjithsesi nuk sheh favoritë në këtë duel. “Për ne do të jenë dy ndeshje ndaj një rivali të jashtëzakonshëm. Do të kualifikohet ai që do të tregohet më i zoti në fushë për të lexuar situatat e lojës. Milani është një kundërshtar shumë i rëndësishëm në të gjitha aspektet”, përfundoi deklaratën e tij Spaleti.