Laporta kundër Dekos, ”xixa” për trajnerin
Drejtori sportiv i klubit gati t’ia besojë stolin Konseisaos
Presidenti i klubit kërkon një trajner të profilit të lartë
Te Barcelona lindin shkëndijat e para mes presidentit Joan Laporta dhe drejtorit sportiv të ekipit, Deko. “Mollë sherri” për drejtuesit më të lartë të klubit katalanas është bërë trajneri i ri. Që nga 30 qershori, Ksavi nuk do të jetë më në timonin e ekipit dhe Barcelonës i duhet të gjejë një teknik të ri. Siç ka bërë me dije gazeta “AS”, si presidenti ashtu edhe drejtori sportiv po vënë “baste” për teknikë me profile shumë të ndryshme në çdo kuptim. Nga njëra anë, Laporta është pro sjelljes së një trajneri veteran, me përvojë të gjerë dhe profil të vërtetuar, i aftë të bashkojë entuziazmin e njerëzve, ndërsa Deko preferon një trajner me profil më të ulët, që di të përshtatet me kërkesat e klubit dhe që dëshiron të bëjë një hap përpara në karrierën e tij. Ky është thelbi i përplasjes (nëse mund ta quajmë kështu) mes drejtuesve ku në tavolinë janë dy emra që dallohen mbi të tjerët: gjermani Hansi Flik (i mbështetur nga presidenti Laporta) dhe portugezi Sergio Konseisao ( i mbështetur nga Deko). I pari vjen me nota kredenciale të shkëlqyera kur drejtonte Bajernin ku arriti të fitonte 6 trofe në një sezon - Barcelona gjithashtu pësoi një nga poshtërimet më të mëdha në historinë e saj ndaj ekipit të tij (2-8) në Ligën e Kampioneve - ndërsa i dyti është një institucion në Porto. Por në ndryshim nga portugezi i Portos, Flik ka edhe avantazhin e të qenit i papunë, pas përvojës së tij jo pozitive me skuadrën përfaqësuese gjermane. Ndaj ai nuk do të kjishte asnjë pengesë për të mbërritur në Barcelonë, teksa “Bild” nga Gjermania nënvizon se ai ka
nisur të mësojë dhe spanjishten. Nga ana tjetër, Konseisao ka avantazhin e të qenit një trajner i ri, me ambicie, me talent, që ka mundur të përshtatet me nevojat e klubit të tij dhe që di të përfitojë nga talentet e rinj. Ai përfaqësohet edhe nga Zhorzh Mendesh, i cili ka një marrëdhënie shumë të mirë me drejtuesit aktualë të klubit “blaugrana”. Faktori tjetër në
favor të portugezit është dëshira e tij për t’u larguar nga Porto këtë verë, që përkon me zgjedhjet presidenciale dhe me emrin e Vijash Boash në horizont. Laporta po shtyn fuqishëm për rrugën gjermane - një shkollë trajnerësh që e ka tërhequr gjithmonë, me emra si Tuhel dhe Nagelsman - megjithëse ëndrra e tij e madhe do të ishte Pep Guardiola,
një kandidat krejtësisht i përjashtuar, ose Jyrgen Klop. Lideri blaugrana planifikon të bëjë një përpjekje në javët në vijim me trajnerin e Liverpulit, ndonëse rrethi i afërt i teknikut tashmë ka konfirmuar se dëshira e tij është për të qëndruar një vit pushim. Por tani për tani në tavolinë janë dy emra që dallohen: Flik dhe Konseisao. I pari është basti i Laportës, i dyti është i Dekos.