Toska “përkëdhel” Kofshën: Të mos demoralizohet nga Europiani

PESHËNGRITJE/ Trajneri: Shtërmeni, shkollë shtange

Kampionati Europian i peshëngritjes, aktivitet i zhvilluar disa ditë më parë në Bullgari, ishte një event shumë i fortë dhe i vështirë për talentin e ekipit të Shtërmenit dhe Kombëtares, Ertjan Kofshën. 18-vjeçari e kishte garën e tij të parë ndërkombëtare me të rritur. Ai garoi në Baterinë A të peshave 89 kg, duke i dështuar të tria provat në stilin e shkëputjes, ndërsa në shtytje ngriti 185 kg duke u renditur në vend të nëntë, pa arritur të klasifikohet në dygarësh. Leonard Toska, trajneri i tij te Shtërmeni dhe në Kombëtare, ka komentuar paraqitjen e shtangistit kuqezi në Sofje. Ndonëse para Europianit trajneri kishte deklaruar si objektiv zonën e shpërblimeve, ai së bashku me peshëngritësin e tij u kthyen duarbosh në Shtërmen. Megjithatë në prononcimin e tij për “Panorama Sport”, Toska thekson se Kofsha nuk duhet të demoralizohet nga rezultati: “Shkuam në Sofje për të matur forcat tona në një event ku Ertjan Kofsha ishte më i vogli në moshë nga të gjithë, ndërsa garonte për herë të parë me të rriturit. E dinim që ishte tepër e vështirë, pasi përballë kishim sportistë cilësorë dhe kampion bote. Kështu që nuk duhet të demoralizohemi aspak, por të shohim vetëm përpara. Na presin gara edhe më të forta në muajt në vazhdim dhe po vijojmë intensivisht përgatitjet çdo ditë. Jo vetëm Kofsha, por dhe Rrasa do të ketë gara ndërkombëtare dhe besoj se ai do të na nderojë të gjithëve”, shprehet fillimisht trajneri punëtor shtërmenas, i cili më tej shton: “Gjendja e sportistëve është e mirë dhe po ecim me ritmin e duhur. Në garat për të rinj Kofsha padiskutim që do dalë kampion. Gjithashtu dhe Samoel Rrasa një peshëngritës tepër premtues, do shpallet kampion në kompeticionet ndërkombëtare për para të rinj. Shtërmeni siç e kam theksuar gjithmonë do të mbetet shkollë e sportit të peshëngritjes, ku do të vijojmë të nxjerrim sa më shumë sportistë, për ti bërë më pas kampionë të mëdhenj”, përfundon prononcimin e tij trajneri Leonard Toska. M.MIRAKA