Skënderbeu godet në Laç me Nikajn, ngjitet i katërti
Goli i sulmuesit shkodran në fund ndëshkon skuadrën e Josës
Korçarët oportunistë në transfertë, kurbinasit ndalen te traversa
Fitore e madhe e Skënderbeut në Laç, 0- 1 falë një goli të Ardit Nikajt, në minutat e fundit. Korçarët kanë dalë me 3 pikë nga një transfertë shumë e vështirë dhe e shohin veten në vend të 4-t, me 37 pikë, duke lënë pas dy skuadrat kryeqytetase, Dinamon dhe Tiranën. Laçi në anën tjetër, nuk po arrin të fitojë prej javësh dhe ka rrëshqitur në renditje, duke qenë më afër zonës së ftohtë se “Final 4”. Duhet theksuar se ndeshja ishte përgjithësisht e barabartë, me raste për të dyja skuadrat, por kurbinasit nuk patën fat, duke humbur disa raste të mira shënimi, ndërsa Melo u ndal nga traversa në pjesën e dytë.
PJESA E PARË - Ndeshja nisi me një dominim të lehtë të Skënderbeut, me sulme të shpejta dhe të qarta të korçarëve, por pa rezultat. Rastet më të pastra të ndeshjes do t’i kishin kurbinasit. Manellari “hëngri” golin e avantazhit në minutën e 11të, pas një pasimi të Sobouejll, duke gjuajtur jashtë nga shumë afër portës. Sulmuesi kryesor i Laçit ishte protagonist për skuadrën e tij edhe në vazhdim. Në një rast pasimin e tij nuk e shfrytëzoi si duhet Melo, ndërsa në një rast tjetër ai gjuajti jashtë kuadratit të Alias. Skënderbeu kërkoi të shfrytëzonte shpejtësinë e Rashicës, që ishte i rrezikshëm, por jo konkret.
PJESA E DYTË – Prodani krijoi rrezikun e parë të kësaj pjese, kurse korçarët u kundërpërgjigjën me Nikajn, goditja e të cilit u ndal nga Dajsinani. Trajneri Mirel Josa nisi të freskojë skuadrën, duke aktivizuar Myrtën për Manellarin e më pas Bajramajn për Tresën. Laçi ishte pa fat kur kishte kaluar një orë lojë, pasi gjuajtja e bukur e Melos u ndal nga traversa. Më pas loja u përqendrua më shumë në mesfushë, me pak sulme të rrezikshme, edhe pse kurbinasit ishin më këmbëngulës. Melo humbi edhe një rast të pastër me kokë, duke gjuajtur me kokë jashtë kuadratit nga afër portës. U duk se gjithçka do të përfundonte me rrjeta të paprekura, por Skënderbeu shfrytëzoi në mënyrën më të mirë një rrëshqitje të mbrojtësit Lima. Xhantu, i futur në fushë si zëvendësues, pasoi saktë në zonë për Nikajn, që me gjakftohtësi mposhti Dajsinanin dhe i dha 3 pikë të arta
skuadrës së tij. Kurbinasit morën edhe një goditje të fortë psikologjike dhe nuk mundën të reagonin në minutat shtesë. Një humbje që komprometon kampionatin e kurbinasve, ndërsa korçarët në anën tjetër vërtetojnë se janë një skuadër solide.