Arteta: E dija që do të shënonim vonë
Tetë fitore radhazi, Arsenali merr kreun e Premier Ligës
Mikel Arteta mendon se Arsenali ishte i destinuar të shënonte një gol fitoreje në fund dhe të mundte Brentfordin. Edhe njëherë, “topçinjtë” e lanë vonë fitoren e tyre, ndërsa goditja me kokë e Havercit e dërgoi rekordin e londinezëve këtë sezon në 8 fitore radhazi, duke u ngjitur në krye të Premier Ligës. Trajneri spanjoll falënderoi tifozët për atmosferën dhe pasionin e tyre për të nxitur skuadrën, pasi goli i Deklan Rajsit, u barazua nga Uiza në pjesën e parë, me ndihmën e një gafe të portierit Ramsdejl. Por Arteta tha: “Ishte një paraqitje e shkëlqyer, një rezultat i shkëlqyer ndaj një kundërshtari shumë të vështirë. Kemi kapërcyer një moment të vështirë dhe jam shumë i kënaqur me mënyrën se si reagoi ekipi dhe individualisht se si lojtarët e kuptuan detyrën. Ishte e pabesueshme edhe mënyra se si reagoi tifozeria; sa shumë na ndihmuan sërish, energjia që dhanë, entuziazmi dhe zhurma brenda stadiumit - kisha një ndjenjë se do të shënonim. Është e pamundur të mos e ndiesh. Ata po luajnë për çdo top, po drejtojnë ekipin, po e shtyjnë skuadrën, po e mbështesin ekipin në një moment të vështirë dhe kjo ndryshon botën tonë, sinqerisht. Tani në Premier Ligë ne nuk do të luajmë një ndeshje për 19 ditë dhe fokusi ynë i plotë është te Porto. Ne mund të arrijmë diçka që nuk e kemi bërë për 14 vjet dhe kualifikohemi në çerekfinalet e Champions-it. Kjo është sfida përpara nesh. Ju lutem tifozëve të na japin më shumë mbështetje të martën kundër Portos, sepse do të na japë një shans të madh për të kaluar”.