Titull, rinovim dhe afrime, Inzagi sheh nga e ardhmja
Trajneri po jeton momentin më të mirë në karrierë
Inzagi ka festuar ditëlindjen e 48-të dhe e ka bërë në momentin më të bukur të momentit të tij. Torta që preu përpara të gjithë skuadrës dhe stafit ka qenë më e ëmbël se kurrë. E ëmbël si urimet e drejtuesve dhe skuadra, përpara se të stërvitej. Për dhuratat ka kohë... Në fakt lista e dhuratave është e gjatë që do të marrë në fundin e këtij sezoni, por fillimisht duhet që ai të zyrtarizojë “dhuratën” për tifozët dhe për veten, titullin kampion numër 20 të historisë që do të thotë ylli i dytë në fanellën e skuadrës. Dhe pas këtij momenti do të jenë drejtuesit që do të hapin “thesin” e dhuratave. Si fillim do të vijë rinovimi i trajnerit deri në vitin 2027 me rrogë më të përmirësuar sesa ajo aktualja që do të shkojë deri në 6,5 milionë euro në sezon. Inzagi do të ketë një tjetër projekt 3-vjeçar për të vazhduar të dominojë Italinë dhe të provojë sërish në Champions, ëndërr e ndërprerë në finale vjet dhe e mbetur përgjysmë këtë vit në fazën e 1/8-ave. Dhe për të arritur deri në fundin e kompeticioneve, trajnerit i duhen lojtarë. Dy afrime janë bërë në merkato, Zielinski dhe Taremi, ndërsa dëshirat e mëdha janë në mbrojtje dhe sulm. Mario Hermoso dhe Albert Gudmunson janë emrat që qarkullojnë si afrimet e mundshme të Interit në merkaton e verës. I pari mund të vijë si lojtar pa kontratë, ndërsa vështirësitë më të mëdha janë për sulmin. Sigurisht që klubi është i gatshëm të ndërtojë një ekip të fortë dhe me alternativa të shumta për trajnerin Inzagi pasi do të marrë pjesë në një Champions me formulë të re dhe në Botërorin e Klubeve, që po ashtu ka një tjetër format. Kështu që të gjithë po shohin nga e ardhmja, pa harruar të tashmen që është titulli kampion. Pas tij do të vijnë momentet e tjera të bukura për trajnerin Inzagi dhe për botën zikaltër.