Egnatia super, trondit “demat” me Montenegron
Dopietë e sulmuesit, Skuka nuk i mjafton Partizanit
Rrogozhinasit u japin “leksion” kampionëve, blindojnë kreun
Egnatia i jep dy shu plaka Partizanit, që zgjohet vonë dhe sheh t’i ikë shansi i radhës për të arritur vendin e dytë. Ndeshje spektakolare në Rrogozhinë. Miqtë qarkullojnë topin, por Egnatia është “e hidhur” në kundërsulm dhe Montenegro realizon dy herë në të parën. Në të dytën shënon Fernando, por Alla e anulon golin dhe ndeshja komplikohet. Hap ndeshjen Skuka në të 80-ën, por Egnatia me shumë sakrificë ruan avantazhin dhe blindon kreun.
PJESA E PARË – Partizani e nis me vrull dhe presing në metrat e para të zonës së Egnatias. Rrezikon në dy momente me Carën dhe Bintsukën, por rrogozhinasit bllokojnë në kohë, pa rrezikuar kuadratin e Sherrit. Egnatia e ka të vështirë të qarkullojë dhe të avancojë drejt portës së Qirkos. Në minutën e 10-të Cara tregohet shumë i shpejtë dhe mësyn drejt portës së Sherrit, por tenton një finte përballë Aleksit në fund dhe rrëshqet në momentin kur do të tentonte portën. Kur dukej sikur Partizani po e vinte ndeshjen në rrjedhën e dëshiruar, Egnatia shënon në rastin e parë të krijuar në minutën e 14-të. Kros perfekt i Ndrecës në zonën e vogël dhe Montengro i jep të shtyrën e duhur për të tundur rrjetën e Qirkos për 1- 0. Pas dy minutash rrogozhinasit i afrohen sërish golit, këtë herë me Ndrecën, që lëshon një “silurë” drejt Qirkos, i cili grushton me vështirësi dhe shpëton portën. Partizani qarkullon topin, por Egnatia shfaqet sërish në të 25-ën. Fernando jep një pasim vertikal për Zejnullain, i cili në pozicion të vështirë e kontrollon topin dhe tenton portën, por Qirko hapet dhe mbyll hapësirën. Në të 30ën Egnatia tregohet cinike dhe i jep goditjen e dytë Partizanit. Top i grushtuar nga Sherri në zonën e vendësve, topi mbërrin te Fernando, i cili ndërmerr një aksion individual fantastik, teksa mbërrin në zonën e kuqe dhe gjen Montengron. Sulmuesi nga Kosta Rika bën detyrën, duke shmangur një nga mbrojtësit dhe postuar topin në rrjetë, pavarësisht përpjekjes së Qirkos. Pak çaste më pas tenton Ahmetaj nga distanca, pa gjetur dot portën. Në të 41-ën Egnatia lëshon hapësirë në mbrojtje, rrëmben topin Keko, i cili nga shumë pranë portës bllokohet nga Sherri.
PJESA E DYTË – Egnatia shfaqet e rrezikshme që në sekondat e para, me Montenegron, që godet rrezikshëm me të djathtën në cepin e zonës, por devijimi i Maget e çon topin në rrjetën e jashtme. Në të 59-ën Zejnullai gjuan nga një pozicion i prirët, që përfundon nën
kontrollin e Qirkos. Në të 67-ën Egnatia flirton me golin e tretë, por Buxhelaj bën heroin, që bllokon gjuajtjen e Fernandos në zemër të zonës. Më pas gjuan Ndreca, por topi shkon mbi traversë. Në të 70-ën, pas një aksioni të Fernandos dhe Montenegros, është braziliani, që
shfrytëzon në maksimum asistin e lojtarit nga Kosta Rika dhe tund rrjetën. Por pas tri minutash shqyrtim në VAR, Alla anulon golin. Në të 80-ën Zejnullai ka një mundësi shumë të mirë në qendër të zonës, por nuk ka forcën e duhur për të sulmuar portën. Në
aksionin në vijim Partizani hap ndeshjen me Skukën. Vertikalizim i Mba për dibranin, që me një diagonale të pamposhtur tund rrjetën e Qirkos. Në të 81ën është radha e Mba për të rrezikuar portën, por pa saktësinë e duhur. Pas pesë minutash provon Bintsuka me kokë, pa
gjetur katërkëndëshin. Në të 89ën Rama i afrohet golit të tretë, por fluturimi i Qirkos i mohon golin. Në të katërtën shtesë Partizani i afrohet golit me Bintsukën, por Fangaj largon topin mbi vijën fatale. Minutat e fundit janë “thriller”, por në fund festojnë vendësit.