Trajneri Fagu i bindur: Nëse kapim “Final 4”, marrim titullin
“Nuk është momenti të gjejmë fajtorët, kjo fitore na çliron”
i Tiranës: Kalojmë ngërçin dhe realizojmë synimet
Erbim Fagu mund të marrë frymë lehtë sisht, të paktën deri në ndeshjen e radhës me Erzenin, që Tirana do ta luajë këtë të premte. Tri pikët e vuajtura kundër Kukësit janë të rëndësishme për vazhdimësinë dhe pas ndeshjes, trajneri i Tiranës theksoi se nëse skuadra e tij kap “Final 4”, atëherë do të jepte gjithçka për të fituar titullin.
Një fitore që mezi e prisnit. Pse vuajtët kaq shumë?
Sigurisht, sepse për ne ishte shumë e rëndësishme fitorja për vazhdimësinë e kampionatit. Kukësi kishte rastet e veta dhe lamë shumë hapësira mbrapa. Por, na interesonin 3 pikët dhe ia arritëm qëllimit.
Ndeshja e dytë që skuadra nuk pëson gol. Është ky një sinjal i mirë për fazën mbrojtëse të ekipit?
Është shenjë e mirë që nuk pësojmë gol. Kemi filluar të kemi stabilitet në mbrojtje. Kemi pasur një ngërç psikologjik, sepse rezultatet nuk kanë qenë në favorin tonë. Shpresoj që me këtë fitore ta kemi thyer akullin dhe të vazhdojmë për në “Final 4”.
Në pjesën e dytë Lushkja dhe Najdovski ndryshuan lojën. Përse nuk luajtën nga minuta e parë?
Mbase mund të ishin titullarë, por Najdovski ka kaluar një gjendje gripale para ndeshjes me Skënderbeun. Me Lushkjen donim të freskonim skuadrën, prandaj e zëvendësova kokë më kokë.
Cili është fajtori i kësaj situate te Tirana?
Unë mendoj që nuk është momenti që të gjejmë fajtorët, por duhet të jemi të gjithë bashkë për të arritur objektivat që kishim në fillimin e sezonit. Ishte një ndeshje e rëndësishme për të kapur “Final 4”, por kemi edhe atë të kthimit në Kupë. E kishim përgatitur ndeshjen gjatë gjithë javës dhe ndërrimi i lojtarëve ishte për efekt që ne të vazhdonim të këmbëngulnim te hapësirat që Kukësi linte bosh, ashtu si ndodhi te rasti i golit.
Cili është objektivi i vërtetë i Tiranës në këtë kampionat?
Me organikën që kemi, me lojtarët që kemi, në rast se do të kapim “Final 4”, do të jemi kandidat për të fituar titullin. Shpresojmë ta kalojmë këtë ngërç psikologjik dhe të realizojmë objektivat.