Mehmeti: Punojmë për 4-shen, objektiv kisha qëndrimin

Pas fitores ndaj shijakasve, që e rikthen Dinamon në vend të 4-t, trajneri Dritan Mehmeti theksoi se falënderon lojtarët dhe klubin për sakrificën. Ai pranoi se u bënë gabime gjatë ndeshjes, por rëndësi në këtë moment kanë tri pikët. “Duke pasur parasysh që është një luftë e fortë mes skuadrave, edhe lojtarët marrin pak presion dhe bëjnë gabime, duke dalë nga detyrat e tyre. Për fitoren e sotme (djeshme) dua të falënderoj të gjithë çunat dhe klubin për sakrificën kemi bërë. Kemi prapë luftë, pasi e shohim që është një kampionat i çmendur, por duhet të jemi më të qetë. Duhet të rikuperojmë forcat dhe të mendojmë për ndeshjen e ardhshme”, tha Mehmeti fillimisht. OBJEKTIVI – Më tej, trajneri i Dinamos ka pohuar se objektiv të parë kur mori drejtimin e skuadrës kishte qëndrimin në Superiore. “E kam marrë skuadrën në fund të fazës së parë dhe kam bërë një marrëveshje me stafin tim dhe presidentin, ku objektivi im ka qenë të siguroja Superioren. Kjo është edhe në kontratë. Pastaj merita e të gjithëve bashkë dhe se çfarë ndodh rrugës, unë nuk mund ta parashikoj. Ne punojmë të kapim katërshen. Jam i kujdesshëm, që të mos kemi entuziazëm dhe nëse nuk bëjmë ndeshje të mira, të biem poshtë. Për Meksin më vjen shumë keq, sepse është lojtar i mirë, por i kam dy në të njëjtin krah. E shikojmë që renditja ndryshon nga java në javë, prandaj them që asgjë nuk ka ndryshuar dhe shkalla e vështirësisë rritet. Do të bëj një analizë, kur të jem i sigurt në katërshe”, ka thënë trajneri Mehmeti për “MCN TV”.