POEMA DE MÁRIO PEREIRA ONZALA
Ngiva kusanguluka kwami dikanga Ngiya kumusota anga ngijimbidila Mu ilunga iyi yezala itetu, ngididila Mukwijiya ngalembwa kumusanga Ngiva kusenguluka kwami kulanga Windwa wiza kungizukama, kuxidila Jipangu jami joso jikala kudifufujula Mu ulebelu wa njila kifwa kyakalunga! Ngiva upulungu wa ngongo kusunga Kusunujuna mwenyu wabendujukila Mukuwufukamesa, mukuwubikijidila Mukudinwisa mu tina mwala manyinga Ngiva kusanguluka kwami kungilenga Mukomona kambonga kami kujimbila Kilunga kya dibata, anga ukala mukudila Ukambelu wa mbolo umuxisa ni kubenga Ngiva kusambalala kwa kufwa kulenga Kyoso muthu ulayela ku tandu ya mbila Ikala, mu izwa yoso, kidi, kumukingidila Ndu kizwa kya kufwa kyakakumusenga Ngiva we hanji mulaye kwimbila anga Wimbilu wabonzejela mukonda njila Dijina dye kilombelombe, kuvumujukila Kididi kyala kimbi ni nzumbi mwalunga Mukonda nzala yamuditunine kulanga Mukutu wabele, wabwila, ki waswila Mu sambwa wa njila dijina dyajimbidila Mbata kitangelu kye akinyana, kakisanga Mu disukilu dya mwenyu exi tudisanga Mu mwenyu wakamukwa waka ikidila Ukambelu wa nzala iminya, izumbukila Ikambesa we hanji kididi kyakudilunga Nzala ilolesa ufwilu kyoso mvula ilenga Ilengesa isunji, imalaweza windwa wila Kuma mutumini wa kalunga ukingidila Ulangelu wa kufwa sekukala kuwukinga