Auch Spaß muss sein

„A Gspaß muass sei“, sagte Herr K. zum Bezirksrichter. „Auch beim Autofahrn. Wann zum Beispiel mei Bruader und i an Ausflug machn, und mir fahrn mit unsere Autos hintereinander, dann hamma immer de greßte Hetz: Wann ma zu aner Kreuzung kumman, wo rot is, steig i aus, geh zu mein Bruadern hintere und schrei eahm ins Autofenster eine: ,Trottl! Kannst net aufpassn?‘

Und er schreit zruck: ,Bleder Hund! Halt de Pappn, wannst selber net fahrn kannst.‘

I schimpf wieder zruck, und de andern Leut schaun bled, und weil alle scho glaubn, jetzt und jetzt werma rafert, dann gib i eahm de Hand und sag: ,Papah, Hanse!‘ und mir fahrn weida. I sag Ihna, Herr Richter, des is de greßte Gsture!‘

Neilich samma ins Burgenland gfahrn, am Neusiedlersee. Des Wetter war so herrlich schön, des wollt ma ausnutzn und a paar Freund besuchn. I vurn, mei Bruader hintn: Endlich samma zu aner Kreuzung kumma, wo immer sehr lang rot is, I bin sofort auße, bin zu mein Bruadern hintere und hab gschrian: ,Se fahrn wia a Depperter! Und dauernd hinter mir!‘

,Schleichn S Ihna‘, hat mei Bruader gsagt. ,Sunst fangen S glei ane!‘

,Aber a ordentliche!‘, hat mei Schwägerin gsagt. ,Hau eahm aufs Aug, den Bledian!‘

,Mischn S Ihna net drei!‘, hab i mei Schwägerin angschrian. ,Frauen im Auto, de hab i scho gfressn!‘

,I friss Ihna glei‘, hat mei Schwägerin gsagt. ,Hanse, gibt eahm ane!‘

Den Moment steigt a Fremder aus sein Auto, kummt zuwe und sagt zu mir: ,Was drahn S denn mit de Leit an, Se Rüpel! Was beleidign S denn de Dame? I werd Ihna glei de Nasn eindrahn, wann S net weidafahrn!‘

Sag i: ,Des is doch alles nur Spaß!‘

,A Spaß?‘, hat er gsagt und hat mi auf mein Kofferraum ghaut. ,Aner Frau drohn, des is a Spaß? Drahn S mit mir an! Kumman S, drahn S mit mir an!‘ Und dabei hat er mi links und rechts ohtetschnt, dass mi von an Kotflügl aufn andern ghaut hat. I klag vier Watschn und a hinichs Stoppliacht ein!‘

Der Täter war nicht erschienen. Herr K. zog seine Klage vor Gericht wieder zurück.