Ein Auf und Ab
Bezirksrichter: „ Sie haben eine Wette gewonnen?“
Karl L.: „ Ja. Aber mir war liaber gwesn, i hätts verlurn. I hab mitn Jerabek gwett, wer schneller ausn sechstn Stock untn is, er zfuaß oder i mitn Aufzug. Und da hab i leider gwunna, obwohl i mitn Aufzug gfahrn bin. Der Jerabek war bei mir auf Besuch, und beim Furtgeh hat er in feuchtfröhlicher Laune mit mir um 50 Euro gwett, dass er zfuaß schneller unt is. Des war für mi sowiaso klar, dass er zfuaß gschwinder oberenna kann, weil unser Aufzug is a Schneckn, aber de 50 Euro warn ma sei Abschied wert.
I bin also eingstiegn, und er hat zum Renna angfangt. Plötzlich hat unser Aufzug an Defekt kriagt; des Liacht is ausganga und hat se in Geschwindigkeit verwandelt, und der Aufzug is mit aner astronomischen Schnelligkeit abwärts gerauscht. In so an Fall äußerster Todesgefahr läuft vor dem innersten Auge das gesamte Leben ab, wobei sich natürlich absturzbedingte Widersprüche ergeben können.
I bin im fünften Stock daham auf d Welt kumma. I habs nämlich eilig ghabt, genau wie mein Kind. Mei Klasse in der Volksschule war im vierten Stock, und bei Freunden im drittn Stock hab i mei Frau kennaglernt. Im zweitn Stock hab i dann im Standesamt gheirat, und an Meter tiafer is bereits unser Bua auf d Welt kumma, wahrscheinlich deshalb, weil mei Gattin bei der Hochzeit scho hochschwanger war. Im erstn Stock hab i un- ser Wohnung im sechstn Stock bezogen, und wia i scho glaubt hab, mi holt im Erdgeschoß der Teifl, hat se im Hochparterr mei Schutzengel als Tiefflieger betätigt und hat mi in Form einer Notbremsung ohgfangt.
Auf de Art bin i vurm Jerabek untn gwesn, und jetzt wüll er ma de 50 Euro net gebn. Er sagt, mei Absturz war a Schmäh, von an Unglück kann ka Red sei, sunst hätt i net beim Aussteign so frisch und um zwanzg Jahr jünger ausgschaut. Der Mann vergisst, dass mei innerer Lebenslauf bei der Geburt von mein Sohn gstoppt wurdn is! Der Bua is heut vierzg Jahr alt. Da hätt i ja bis in Keller falln müassn, nur damit i um zwanzg Jahr älter ausschau!“
Herr Jerabek, der nicht nur eine Ohrfeige erhalten hatte, zog seine Klage wieder zurück.