Schwarzfahrer
Peter N.: „ I fahr neilich in der Straßenbahn, sitzt nebn mir a Herr mit aner größern Schachtel auf de Knia, wo normalerweis de klanern Fernsehapparat drin san. Und wia ma so fahrn, steigt bei aner Haltstell a Kontrollor zua und wüll de Fahrscheine sehn.
I zeig eahm mein, der Herr nebn mir fangt zum Suachn an, in de Westntaschln und im Huatbandl, fahrt se mit an Finger ins Uhrwaschl, net, weil er durt sein Fahrschein gsuacht hat, sondern aus Verlegenheit, steht dann auf und sagt zu mir: , Gehn S, haltn S ma den Karton, damit i mein Fahrschein suach kann!‘ und stellt ma sei Schachtl auf de Knia; sie war net schwer, des Gegenteil sogar, nämlich leicht, der Herr hat in de Hosnsäck gstierlt und in sein Geldtaschl und hat dann gfluacht: , Der Fahrschein muass ma in Karton einegrutscht sein!‘
Drauf hat er de Schachtl aufgmacht, es war a Faltkarton, hat auf der Seitn einegschaut und hat an zweitn Karton außegnumma. Den zweitn, der was a bissl klaner war wia der erste, hat er mit an flehenden Blick dem Kontrollor vur de Füaß gstellt und hat aus dera Schachtl no a dritte außegnumma.
Jetzt hab i erst gsehn, dass der Mann in dem großn Karton mindestens neun bis zwölf Stück jeweils kleinere drin hat, so nach dem System von de russischen Pupperln. Er hat an nachn andern außegnumma, hats aufanander gstellt und gsagt: , Der Fahrschein muass ma dazwischn grutscht sein!“und hat vur dem Kontrollor eine immense Pyramide aufbaut. Ma kann auch sagn, a Schachtelwand, er hat garbeit wia a Häuslbauer mit Hohlziagln, und wia von dem Kontrollor nur mehr des Kappl zum Sehn war, war wieder a Haltstell da, und der Herr is ausgstiegn. Mir habns zerst gar net bemerkt ghabt, i hab sogar glaubt, er macht vielleicht a Pause wia a Maurer, es war nämlich grad neune, und es hätt mi net gwundert, wann se der Herr pausenmäßig a Bier aufgmacht hätt.
Der Mann is nämlich ein geriebener Schwarzfahrer, der was immer a Packl Kartons mithat. De kriagt er im Supermarkt. Wann net der Schwarzkappler mit an guaten Funkgerät ausgrüst gwesn war, hättns eahm nie derwischt.“
Der Schwarzfahrer erhielt eine Geldstrafe.