Schon probiert?
Bezirksrichter: „ Sie sehen so heruntergekommen aus!“Thomas J.: „ Ja, i war jetzt im viertn Stock, bin aber herunter gekommen, weil i ghört hab, dass de Verhandlung im Hochparterre is. Aber der Grund, warum i so schlecht ausschau, is a anderer. Lassn S Ihna derzähln, wia de Gschicht war.
I hab an Bekannten, des is a Erfinder. Neilich hab i eahm wieder besucht, hat er grad in an Tegl a aromatische Masse angrührt.
, Sind Sie Träger von dritten Zähnen?‘, hat er mi gfragt.
Sag i: , Ja. Aber bei mir haltn de Gebisse so schlecht.‘ Mant er: , Des is ja a Witz.‘ Sag i: , Derzähln S ma jetzt kan Witz, weil wann i lach, falln ma de Zähnd obe!‘
Mant er: , Ihna kann geholfn werden. Des, was i da anrühr, is mei neueste Erfindung: Dentobeton! Wann S Ihna mit dem des Klavier einstreichen, verliern S es nie wieder. Wolln S es probiern? I schmier Ihna ein!‘
Nachdem a Mensch wia i nix zu verlieren hat, außer seinem falschen Gebiss, hab i ma von eahm mit dem neichn Klebstoff de Zähnd anpickn lassn. Er hat gsagt, i muass zehn Sekundn lang zsammbeißn, und dann wia i vur Überraschung sprachlos sein.
Des, was er gsagt hat, hat gstimmt. I hab nämlich nach zehn Sekunden de Zähnd überhaupt nimmer ausanander bracht, weil er ma vül zu vül einegschmiert hat, wodurch se de obern mit de untern Zähnd zsammpickt habn. I bin vur eahm gstandn wia a gelähmtes Versuchskaninchen mit bleckenden RabbitZähnen, aber ausanander bracht hab is nimmer.
Er hat gsagt, des is nur a Zeichn der immensen Haltbarkeit, und eigentlich a guates Zeichen. Deshalb haßt es ja auch Dentobeton – mas- siv wie Beton. Und dann hat er ma als Lösungsmittel an starkn Schnaps zwischen de Zähnd gschütt. Weils nix gholfn hat, hat er ma no a Flascherl mitgebn und hat gsagt, i soll daham mit an Strohhalm gurgln, dann geht de Sache wieder auf.
Beim Heimfahrn hab i dann mit an Herrn an Streit ghabt, bei dem i zu kan anzichn Wurt kumma bin und de Ausanandersetzung nur als stiller Teilnehmer miterlebt hab. Mi hat erst wieder a Dentist zum Redn bracht.“
Der Kläger Franz A. („ Mir is der Herr als a Bsoffener in der Elektrischn aufn Fuaß gstiegn. Auf meine Aufforderung: , Entschuldigen S Ihna – aber schnell!‘ hat er mi nur wia a bissiger Wachhund anknurrt!“) zog seine Klage wegen grimassenhafter Ehrenbeleidigung wieder zurück.