Sein oder Nichtsein
Alsdann,
de Gschicht war a so“, berichtete Herr L. dem Bezirksrichter. „ I bin neilich mit mein Auto in der Nacht von an Heirichn hamgfahrn und hab an Luftballon für mei Freundin mitghabt. Auf den Luftballon war a lachterts Gsicht und a paar gschnecklerte Damenhaar draufgmalnt. I hab eahm am Schnürl nebn mir am Beifahrersitz hänga ghat, und wia i dann bei an Zigarettnautomatn vurbeikomma bin, bin i steh bliebn und bin ausgstiegn, damit i ma a Packl Zigarettn kauf. Geht a Besoffener bei mein Auto vurbei und ruaft beim Beifahrerfenster eine: , Hörn S, da is a Halteverbot! Da kummt glei a Lieferant mitn Lkw! Schauts, dass bald weidakummts!’
Nachdem der Zigarettnautomat a bissl gspunna hat, hab i net gleich zruckgeh könna; haut der Bsoffene mit der Faust aufs Fenster und schreit: , Lachn S net so bled auße, Fräulein! Mit dem Gsicht machert i gar net de Pappn auf! Se habn ja a Gebiss wia a Nussknacker! Was hupfn S denn da drin umadum wie a Narrische, wolln S mi moscherln? Hat an Pluzer wia a preisgekrönter Kürbis und grinst auße wia a Hutschpferd! Wo isn der Fahrer? Reißts oh, aber gschwind!‘ – Jetzt bin i zuweganga und hab zu dem Herrn gsagt: , Machn S da kan Markt! Se verschaun Ihna a bissl, weil es is finster, und de Scheibn san anglaufn!’
Drauf is er ruhiger wurdn, direkt verlegn, und hat gsagt: , Is des de Frau Gemahlin? I sag ihr freundlich, dass da net steh dürfts, und was macht der Gnädige? Sie tanzt drin umadum! Wia a angmalnter Lampion! I bin net ihr Trottl, sagn S ihr des!’ Drauf hab i den Mann von mein Auto wegdruckt, er hat se anghaltn, der Luftballon hat drinnen geknickt, und da hat er sein zweitn Tobsuchtsanfall kriagt. , Du ohbundene Blunzn! I watschn di oh, dass d glaubst, du bist a Luftballon!’ Drauf hab i eahm um d Erd ghaut. Nur damit i einsteign kann. Er hat no gschrian: , Mongolisches Überban!’ I bin schnell furt. I bin net verheirat. Aber i war net in Stimmung, dass i eahm um ans in der Fruah meine Familienverhältnisse erklär.“
Herr L. war dem Betrunkenen angeblich über die Zehen gefahren. Zur Einvernahme eines Zeugen wurde die Verhandlung vertagt.