Yeti auf dem Großglockner
Ein Herr zu einem anderen: „ Wegn was san S denn da?“– „ Wegn aner Kreditsache. I leb auf großem Fuß.“
Der Erste: „ Na, da gehts Ihna fast so wia mir. I bin nämlich aa wegn meine großn Füaß da. I hab a Achtavierzger- Schuachgröß, wann i Galoschn anhab, kann i damit Wasserskifahrn. Leider hab i aber aa an teppertn Nachbarn, der was a so a klans Hirn hat, dass S es mit Leichtigkeit in an Babyschuach unterbringan, sogar dann, wenn bereits a Babyplattfuaßeinlag drinliegt. Mir wohnan am Fuße des Großglockners. Der Mann büldt se ein, dass bei uns ein Yeti lebt, a Schneemensch, der was ausn Himalaya abstammt und von dem er scho mehrmals de Fußabdrücke gsehn habn wüll. Wahrscheinlich hat er de meinigen gsehn, weil i geh aa im Schnee furt; i werd do net wegn mein angschüttn Nachbarn im Winter dahambleibn, nur damit er net glaubt, mir habn an Yeti bei uns. Er hat vermutet, dass des a weiblicher is, a so genannte JettiTant, und hat se dazua a mörderische Idee einfalln lassn.
Er hat auf den Weg, wo i allerweil von an Wirtshaus hamgeh, mittn in an Wald, a Gruabn ausghobn, an Meter lang, achtzg brat, und hat de zwa Meter tiafe Gruabn sodann mit Ästen bedeckt. Nachdem natürlich in an verschneiten Wald sogar a Yeti, wanns an gabert, sofort überziagert, dass da was net stimmt, und möglicherweise auf Zehenspitzn, de was bei an Yeti no immer so groß wia a Schöpflöffel san, um de Gruabn umadumgingert, hat er über de Astln zirka vier Kilo feinsten Kunstschnee versprüht, den was er se selber mit aner Schneeruatn aus zwanzg Eier, a bisserl an griffigen Mehl und vier Liter Mülch gschlagn hat. I geh um a zwölfe in der Nacht ham, waß natürliche net, was gschlagn hat, und plumps, liag i scho drinn. Glei drauf is mei Nachbar kumma, er hat mi im Schein einer Fackel glei erkannt und hat aber trotzdem obegschrian: , Yeti- Aff, liegst untn?‘ – I hab den Affn einklagt. Weil wann i mit an Affn hamgeh, fall i öfters in a Gruabn. Aber schimpfn lass i mi net.“
Der Grubengräber („ I hab nur obegruafn: , Je, tiaff liegst untn!“) ist ein entmündigter Kleinhäusler. Das Verfahren gegen ihn wurde eingestellt.