Heiteres Bezirksgericht
Fesche Puppe
Alsdann, de Gschicht war a so“, berichtete Herr N. dem Bezirksrichter. „ I war neilich wieder amal mit mein Schwagern bei der AntschiTant, um an Eierlikör, und da hat uns a Gschäftsmann ersucht, dass ma eahm a Auslagnpuppn in a andere Ortschaft mitnehman, für a Filiale.
Mir habn net naa gsagt, weil ma eahm kennan, und beim Hamfahrn hab i mi mit der Puppn hintn ins Auto gsetzt, damit is halt und dass ihr nix passiert.
Es war a weibliche Auslagnpuppn mit an blondn Wuschlkopf und aner gstelltn Figur, aber nackert. I hab ihr mei Sakko umghängt, damit s net so unscheniert dasitzt, und habs bei der Hüfte ghaltn, damit s ma net umfallt, weil bei mein Schwagern seiner Fahrweise und seine Notbremsungen hätts leicht sein könna, dass ers untern Fahrn zsammhaut.
Na, mir fahrn so, es war no liacht, und de Sunn hat gscheint, bemerk i, es fahrt aner hinter uns, der mei Frau kennt.
, Herst‘, hab i zu mein Schwagern gsagt. , Bleib steh! Der hinter uns lacht scho so bled, der glaubt anscheinend, i hab wirklich a Madl nebn mir. I wüll kan Wickl daham habn, i gibs zu dir vire!‘
, Ja, freilich, was denn‘, hat mei Schwager gsagt. , Der hinter uns kennt mei Frau aa. Soll i mi wegn der Plastikgodl in an falschnVerdacht bringa lassn? Lass nur schön hint. Wammas in Kofferraum legn, glaubt der vielleicht, mir habn ane umbracht.‘
Drauf hab i de Puppn, damits der hintn nimmer siecht, mitn Kopf auf mein Schoß druckt, bin aber glei drauf- kumma, dass des zu Trugschlüssen Anlass gebn kann, weil der hinter uns hat glei an sinnlichen Mund kriagt. Drum hab i sie, scho fuchsteiflswüld, wieder aufgsetzt und hab ihr mei Sakko obegnumma, hat der hinter uns Stülaugen kriagt, dass se seine Pupülln wia zwa Hühneraugenringerln auf der Windschutzscheibn brat druckt habn.
Jetzt is ma de Sache aber wirklich z bled wurdn, i hab de Figur gnumma und habs mit den Beinen nach obn nebn mi hinglahnt, damit der Bledian endlich siecht, dass des a Attrappn is. Drauf is er mit an stieren Blick so nah zuwegfahrn, dass er uns glei danach, wia mei Schwager bremst hat, auf der Stoßstangen pickt is. Den Mann ghörn vom Amtsarzt Augngläser verschriebn, oder er soll bitte ehestmöglich an Kurs in weiblicher Anatomie machn, damit er waß, wia a echte Frau wirklich ausschaut.“
Der Auffahrer wurde zu einer Geldstrafe verurteilt.