Hutschenschleuderer in Not
„I bin a Hutschnschleuderer“, sagte der Schaustellergehilfe Eduard P. zum Bezirksrichter. „Währenddem i de Hutschn schleuder, tuat mei Chef danebn in aner Bude als Zauberer arbeitn. Sei Hauptnummer is de Nummer, wo er sei Frau zersagelt. Da legt ers auf a Bett und saglts in der Mittn ausanander.
Leider is sei Frau jetzt schwanger. In letzter Zeit hat er se mitn Zersagln scho immer schwerer tan, es gab auch Unmutsäußerungen aus dem Publikum, weil a Schwangere zersagln wirkt irgendwie bestialisch. Aus dem Grund hat er mi unlängst ruafn lassn, mei Chef, mittn untern Hutschnschleudern und hat gsagt: ,Hurch zua, ab heute zersagl i di. Geh di waschn, mir fangen glei damit an.‘
,Ah‘, hab i gsagt. ,I lass mi net zersagln. Des is nix für mi.‘ Mant er: ,Wiaso net?‘ Sag i drauf: ,Weil i mi fürcht.‘
Sagt er drauf: ,Fürchtn tuast di? Vur was denn? Bleder Hund, glaubst, i zersagl di wirklich? Waßt doch eh, dass mei Frau a jedes Mal wieder als a ganzer aufsteht.‘
,Ja.‘, sag i. ,Trotzdem. I kenn den Trick net, und bei Ihnera Frau passn S vielleicht mehr auf wia bei mir. I hab da vül z vül Angst. I lass ma von Ihna ka Sagl ansetzn. Zerschneidn S de Kassiererin. De is mit Ihna verwandt. Und wann wirklich was passiert und Se halbierns, is des net so schlimm, weil sie is eh nur Ihna Halbschwester.‘
Wird er wüld und schreit: ,Red net so dalkert daher! Du waßt genau, dass unser Kassiererin als Dame ohne Unterleib in der Kassa sitzt. Durt, wo mei Frau jetzt Mutter wird, hat mei Schwester a Geldladl. Wia kann i denn a Frau, de was nur aus einer Körperhälfte besteht, in der Mittn zersagln?‘ – Sag i: ,Aber in Wirklichkeit bestehts doch eh aus zwa Hälften. Mir derzähln S doch nix, i kenn doch Ihna Schwester lang genug.‘
Drauf hat er mi anbrüllt, er vermutet, dass i aa sei Frau besser kenn, als erlaubt is, und wann er ma draufkummt, dass i der Kindesvater bin, zerschneidt er mi wia a Stangl Krakauer, da macht er an Aufschnitt aus mir. So hat er ma droht, aber i bin hart bliebn. Er hat dann unsern Schwertschlucker als Opfer gnommen. Aber der is ja geschützt. Den kann er net zersagln. Der hat immer an langen Kavalleriesabl im Leib steckn.“
Während der Auseinandersetzung war an der „Hutschn“ein kleiner Unfall passiert. Der Hutschenschleuderer wurde freigesprochen.