Frühjahrsputz
„ Neilich war bei unsern Wirtn Frühjahrsputz“, berichtete Herr B. dem Bezirksrichter. „ Des Wasser is knechltiaf am Fuaßbodn gstandn, i wollt gar net einegeh, aber der Hausangestellte hat ma a Schammerl zur Schank gschobn, damit i mi draufstelln kann, weil er waß, dass i in der Fruah immer durt an Kaffee trink.
Na, i steh auf dem Schammerl, trink mein Kaffee, kummt no aner eine, sagt: , Gestattn‘, und stellt se zu mir auf des Schammerl auffe.
Bitte, es war se ausganga; wann zwa ruhig nebenanander stengan, is des Schammerl groß genug. Aber der Herr hat se an doppeltn Weinbrand bestellt, hat eahm auf an Zug austrunkn und hat zum Schwanken angfangt. Fast hätt er mi obegstessn, i hab mitschwankn müassn, damit i net obefall. Auf meine Beschwerde: , Hörn S! Wackln S net a so!‘, hat er mi nur angschaut und hat gsagt: , Gehn S, san S doch stüll! Se wackln ja aa!‘ Dann hat er no a Sodawasser verlangt und hat mit der Hand umadumgruadert, weil ers net glei kriagt hat.
Wann i mi net hin- und herbiag wia a Schülfröhrl im Wind, hätts mi obeghaut in de Baz. Weil der Herr vom Reinigungspersonal hat grad zwa Kübln Wasser wieder aufgschütt ghabt und is mitn Schrubber umadumgfahrn. Und i steh da obn mit an Bsoffenen auf an Schammerl, wia a Surfer, der was mit an zweitn auf an Liliputanerbrettl übern Neusiedler See fahrt.
Wia er dann wieder gschrian hat: , I wüll a Sodawasser!‘, is er mit an Fuaß danebentretn und hat se mit aner Hand an meiner Krawattn anghaltn. Des Schammerl hat se aufgstellt wia a Stiefelknecht, und wann i net gach austarier, warn ma alle zwa unt gwest. Jetzt wars ma na- türlich zbled. I hab eahm mei Bindl entrissn und hab eahm gleichzeitig an Knödlreiter gebn; er hat se schräggstellt wia a Stehaufmanderl, war fast wieder zruckgschwunga, hat aber dann des Übergwicht kriagt und wollt se bei der Kellnerin anhaltn.
Er hats bei an Wadl derwischt, de Kellnerin is nämlich ober uns auf an Tram gsessn und hat in Luster gereinigt. Des Madl hat ausghaut wia a Fiakerroß, der hätts ja no obegrissn, und dadurch is er der Längs nach ins haße Wasser gflogn.
Es warn zwa Kilo Soda drinn, da hat er sei Sodawasser ghabt. I steh auf der Seitn des Wirtn! A Mensch mit an Rausch hat auf an Schammerl nix verlurn.“
Die Klage des zu Fall Gekommenen wurde abgewiesen.