Tarnanzug
Alsdann,
de Gschicht war a so“, berichtete Herr R. dem Bezirksrichter. „ I wollt neilich Zigaretten kaufen, bin i in a Hotel eineganga und wollt in Portier ersuchn, dass er ma wechslt. Grad, wia i mit an Hunderter in der Hand zu dem Portier hingeh, hör i, wia er zu an Herrn und zu seiner Begleiterin sagt: , Heut dürfts net so lang brauchn! Es san scho vül Fremde da, denkst an an Fremdenverkehr! Länger wia zwa Stund dürfts ma des Zimmer net blockiern! Andere wolln aa auffe!‘
Jetzt hab i gwusst, i bin in an Stundenhotel, und den Moment is a Rauchfangkehrer über de Stiagn obekumma. Und zwar a Herr, den i vom Kaffeehaus kenn. I hab gar net gwusst, dass er a Rauchfangkehrer is, weil er im Kaffeehaus immer in Zivül sitzt. Aber dermal war er in Berufskleidung und ganz schwarz im Gschicht, und wia er mi gsehn hat, hat er gsagt: , Ja, wen trifft ma denn da? Na, von Ihna hätt i ma des net denkt!‘
Sag i zu eahm: , I muass wechseln!‘
Mant er: , Ja, ja. De meistn Herrn san da, weils wechsln müassn. De eigene Frau genügt eahna net, drum müassns ab und zu wechsln. Aber von Ihna hätt i ma des net denkt!‘
Drauf halt i eahm den Hunderter hin und sag: , Herr Meister, damit ka Irrtum aufkummt . . .!‘ Taucht er mei Hand weg und sagt: , Ghaltn S Ihna des Geld. Se brauchn ma nix gebn, i bin ka Gatschn, i derzähl schon nix weida. Nur denkt hätt i mas von Ihna überhaupt net!‘
Jetzt bin i schon bes wurdn und hab gsagt: , Redn S net so bled! Se san ja aa da!‘
Drauf deut er auf sei Berufswerkzeug und sagt: , I hab da bürscht!‘ Taucht hinter eahm a Stubnmadl auf und sagt: , Des wiss ma. Aber des nächste Mal passn S a bissl mehr auf! Des Bett is ganz schwarz, und de Dame steht no allerweil unter der Brause, weils den Ruaß net obebringt. Müassn S Ihna denn ausgerechnet als Rauchfangkehrer tarnen, wann S zu uns kumman?‘
Jetzt hab i gwusst, dass er gar ka Schornsteinfeger is, und hab eahm mei Meinung gsagt. Tätlich bin i net wurdn, meine Hände sind rein. An so an Menschn straf i net an.“
Der falsche Rauchfangkehrer zog seine Klage wegen Ehrenbeleidigung zurück.