Immer dasselbe mit den Nachbarn

Ikenn meine Leut“, berichtete der Hausbesorger Karl Z. dem Bezirksrichter.„ I kenn scho meine Vogerln, de was se bei Nacht und Nebel in Hof schleichn und in ohgramtn Christbam anfach nebn de Mistkübln hinlahnan. Weils zfäul san, dass eahm zerhackn. Und de Gwirks hab dann i. Nimmt denn a Mistmann heutzutag an Bam mit? Ja, wanns eahm an Honig ums Mäu schmiern. Sunst net.

Neilich hab i auf d Nacht durch a Fenster gsehn, wias bei da Familie Lischka, wia jedes Jahr nach de Heiligen drei Könige, in Bam ohraman. Jetzt haßts aufpassn, hab i ma denkt. Der Lischka hat ma scho vurichs Jahr sein Bam zuwedraht, da hab i eahm net dawischt dabei. Aber heuer macht er ma des net.

I hab hintern Vurhang passt, bis um a elfe, wia der spannende österreichische Krimi im Fernsehn aus war. Dann is bei de Lischka finster wurdn, und i hab mi in erhöhte Alarmbereitschaft versetzt.

Hat net lang dauert, san s scho obegschlichn, de zwa. Sie, de Schlaue, hat zerst an meiner Tür ghurcht, ob i scho schlaf. Na, i hab anständig a Schnarchen imitiert, dass ma glaubn hätt könna, a Kreissagl rennt, hat sa se täuschn lassn und hat leise de Hoftür aufgmacht.

Dann is er mit dem Riesnbam am Buckl, wia der Knecht Ruprecht, langsam in Hof auße und hat den Bam geräuschlos bei der Klopfstangen zuweglahnt.

Aber da war i scho da. I bin glei bei mein ebenerdign Hoffenster außegstiegn, und wia se der Lischka umdraht hat, bin i scho hinter eahm gstandn. Hättn S sehn solln, wia er derschrockn is! Vur lauter Schreck hat er fast de Frasn kriagt und is gegn sein Bam tamelt, dass de Nadln nur so grieslt san.

Jetzt behauptet sei Frau, i hätt ihrn Mann mitn Hals an de Klopfstangen druckt. Angeblich soll man sogar no sehn, wo i eahm de Fingernägl angsetzt hab. A reine Erfindung! I bin a Näglbeißer seit meiner neurotischen Jugend – mei Vater war a Choleriker. I hab gar kane Fingernägl. Na guat, i bin a ruheloser Mensch und hab a paar Defizite, was meine nicht geglückte Kindheit betrifft.“

Da Frau Lischka als Zeugin nicht erschienen war, musste die Verhandlung vertagt werden.