Schäfer( viertel) stündchen
Alsdann, de Gschicht war a so", berichtete Herr Z. dem Bezirksrichter. „ I geh neilich auf der Gassn, kummt a Herr zu mir zuwe und sagt: , I hätt a Bitte an Sie! Streitn S mit mir a bissl.’
, Ja, sag i. , Aus was für an Anlass? Mant er: , I werd Ihna des später erklärn. Aber jetzt san S so liab, und tuan S so, wia wann S mit mir a Ausanandersetzung hättn! Fahrn S mi an, schrein S mit mir, gebn S ma an Renner! I hau net zruck, höchstens ganz leicht, i markier, aber Se können mi angehn wia a Narr, da brauchn S kane Hemmungen habn! Na, gengan S! San S fesch! Fangen S scho an! Nachdems damals scho spät auf d Nacht und de Gassn menschenleer war, hab is mit der Angst z tuan kriagt und wollt ohpaschn. Verstellt ma der Herr in Weg und sagt: , San S net so unfreundlich! Haun S ma ane obe! Was is denn da dabei, wann i Ihna um a Gfälligkeit bitt! Des kost Ihna do nix, wann S mi anstänkern! Nur immer zu, fest drauf! Packn S mi beim Krawattl, schimpfn S mi Häusl, treibn S ma in Huat auf, und gebn S ma a Uhrnreiberl! Was zögern S denn no? I versteh gar net, wann ma an Menschn um so a Liebenswürdigkeit bittet, dass er da net glei hinhaut! Also, san S net so grauslich! Verabreichn S ma doch endlich a klane Watschn! Jetzt is ma schon ganz unhamlich wurdn, i hab eahm wegdruckt, damit i weidakumm, lacht er zufrieden und sagt: , Na, endlich, a Stesser! Bei Ihna brauchts aber lang, bis ma zu aner klan Guatheit kummt! Jetzt markier i a Verteidigung, schrei: , Fass ihn!, und leg Ihna gleichzeitig an Polizeigriff an, aber an imitiertn! Achtung, es tuat net weh! Dabei hat er ma an Arm hintrebogn, und den Moment is scho a Hund zuwekumma, der was ma in der Aufregung zerscht gar net aufgfalln war. Des Viech, ein deutscher Schäferhund, hat mi überfalln und hat mi a Viertlstund lang dermaßen karnieflt, dass i nachher wia a ohkieflts Ban ausgschaut hab. Des Schäferviertelstündchen, bei dem dann sogar a Dame, anscheinend sei Frauerl, zuagschaut hat, wird ma no lang in Erinnerung bleibn." Der Hundebesitzer (" Mir wolltn nur wissn, ob unser Hund scho scharf gnua is, dass er uns verteidigt!") muss nebst einer Geldstrafe noch Schmerzensgeld zahlen. Obendrein: 14 Tage Haft.