Wohltätigkeitsball

Bezirksrichter zu Otto P.: „ Sie sind wieder einmal von dem Mann Ihrer Freundin misshandelt worden!“

Otto P.: „ Ja. Nur bin i dermal net sicher, ob er überhaupt gwusst hat, dass des i bin, den was er dauernd in de Pappn haut. Mir warn nämlich auf an Wohltätigkeitsball, er mit seiner Frau und i allan, wobei er natürle net gwusst hat, dass i aa durt bin. Auf dem Wohltätigkeitsball hats verschiedene wohltätige Einrichtungen gebn, a Tombola, an Flohmarkt und a klane Schießbude, wo ma mit Tennisballn auf bewegliche Köpf gschossn hat, so nach dem Motto: Runter mit dem Zylinder. Na, i geh so in den Räumen umadum und schau ma alls an, auf amal siecht er mi, wird wüld und rennt ma nach. I hab sofort zu flüchten angfangt, er hinter mir nach.

In de Tombola hab i mi net traut, weil durt is alls nummeriert, und da hat er mi scho vurichs Jahr mit seiner Frau bei aner Nummer derwischt. Ich floh also zu dem Flohmarkt, hab aber bemerkt, dass i eahm durt unter den altn Glumpert mit meiner jugendlichen Schönheit sofort auffall, und hab mi darum schließlich hintn in dera Schiaßbudn versteckt. Durt hab i mi auf a Zenträuhazung gsetzt und hab ma denkt, jetzt kannst mi lang suachn, da findst mi nie. Aber glei drauf hab i gspürt, dass der Zentralheizungskörper so unhamlich haß is, dass ma auf eahm gar net sitzn kann, und i hab mi notgedrungen etwas aufgerichtet. Dadurch bin i mit mein Kopf im Schussbereich von dera Schießbude erschienen, i hab gsehn, mei Nebnbuhler steht durt, mit fünf Balln in der Pratzn, und hab glei drauf von eahm an stanhartn Tennisballn ins linke Aug kriagt. I bin sofort wieder obe, bin aber dadurch mitn Hintern wieder auf de brennhaße Zenträuhazung kumma und hab wieder in d Höh müassn, wodurch i glei wieder von eahm an Balln ins Gsicht kriagt hab. Auf de Art hab i nach zehn Minutn a Gfriss wia a zsammghauter Preisboxer ghabt, und der anziche Trost is, dass des Ganze an karitativen Zweck zugute gekommen is. Ma kann sagn, a jeder Ball, der mi troffn hat, war ein Wohltätigkeitsball.“

Der Ehemann („ In Ottl sei Watschngsicht kamma leicht für an ausgstopftn Sagschartnschädl haltn!") wurde freigesprochen.