Bernascheks Masche

Alsdann, de Gschicht war a so“, berichtete Herr L. dem Bezirksrichter. „ I fahr neilich mit mein Motorradl durch a Gassn, siech i, der Herr Bernaschek kummt ma entgegen; a Bekannter, der was in der Näh von mir wohnt. I bin sofort stehbliebn und hab eahm gfragt, ob i eahm mitnehma soll, hat er gsagt, er gfreuert se, wann i eahm hamführert, aber er hat no kurz in an Gschäft was ztuan.

Drauf hab i gsagt, wanns net zlang dauert, wart i. Hat er gmant, lang wirds net dauern, weil er wüll a gstrickte Westn umtauschn geh, de was eahm sei Frau gschenkt hat und de was eahm leider vül zu groß is.

, Wissn S‘, hat er zu mir gsagt. , I wüll mei Weiberl net kränkn. I hab ihr no ka Wurt davon gsagt, dass ma de Westn net passt, obwohls ma wirklich vül zu groß is. Jetzt geh i halt eine und frag, obs mas umtauschn; wann net, ghalt i mas, weil kränkn tua i mei Frau net.‘

I hab eahm gfragt, wo er de Westn hat, hat er gsagt, er hats an, unterm Sakko, weil er kränkt sei Frau net; er tuat immer so, wia wanns eahm passn tät, und wann ers unterm Sakko tragt, kann er se de Ärmeln, was eahm zlang san, schön einestopfn, und des untere Stückl, was eahm zlang is, des schoppt er se auffe.

So is er halt in das Gschäft eineganga, i hab auf eahm gwart, nach zwa Minutn war er scho wieder heraust und hat gsagt, de tauschn de Westn net um, weil ers scho tragn hat.

, Naja‘, hab i gsagt. , Dann fahr ma halt ham. , Jawohl‘, hat er gsagt. , Dann fahr ma halt ham, weil kränkn tua i mei Frau net.‘

Drauf is er hint aufgstiegn, auf meiner Maschin, i hab eahm hamgführt, und währendn fahrn hab i scho bemerkt, dass eahm durch de Beidlerei beim Fahrn de Är- meln von der Westn außekumman. I habs im Rückspiegel gsehn, de Ärmeln san immer länger wurdn und habn se über seine Händ gschobn wia a gstrickter Bandlwurm. Und untn bei sein Sakkl is ebenfalls de Westn außekumma und is immer länger wurdn, es hat dann scho ausgschaut, wia wann i a Frau mit an Strickkladl hintn am Sozius hätt. Und weil se dann anderthalb Meter Strickwestn in de Spachn von mein Hinterradl verfangt habn, is es dann zu dem klan Unfall kumma, bei dem der Bernaschek von an Polizistn als gnädige Frau angsprochn wurdn is. Bitte um äußerste Diskretion bezüglich der Unfallursache! Der Bernaschek wüll sei Frau net kränken.“

Der kleine Unfall ohne Personenschaden wurde mit einer Geldstrafe geahndet.