Kredithai

Unlängstwar i aus finanziellen Gründen bei an Kreditvermittler“, berichtete Herr B. dem Bezirksrichter. „ Er hat mi glei in a Gasthaus gführt, weil er gmant hat, durt redt ses leichter. , Wia vül brauchertn S denn?’, hat er mi gfragt. Sag i: ,50.000 Euro. Drauf hat er se meine Papiere angschaut und hat gsagt: , I gib Ihna 20.000 Euro.’

, Guat’, hab i gsagt. , Gebn S ma 20.000. Kriag is glei da?’

, Naa’, hat er gsagt, , im Büro.’

Drauf samma wieder zu eahm ins Büro ganga, de Zech beim Wirt hat er auf mein Namen aufschreibn lassn. Er hat gsagt, de kann i dann von mein Kredit zahln. Er hat ma a Formular gebn und hat gsagt: , Des müassn S jetzt ganz genau, fehlerfrei und wahrheitsgetreu ausfülln. Falls Sie unwahre oder unklare Angaben machn, kriagn S kan Kredit und müassn aber auf jeden Fall mei Provision zahln. Drauf hab i zum Schreibn angfangt; er hat se mei Uhr gebn lassn und hat ma zuagschaut. , Is die Zeit limitiert?’, hab i gfragt.

, Naa’, hat er gsagt. , Se können brauchn, solang S wolln. Ihna Uhr hab i ma nur als Pfand für mei Provision gnumma, falls i Ihna kan Kredit gebn kann.’

Wia i gsehn hab, dass glei die erste Frage lautet, ob i scho amal auf der schiefn Ebene war, hab i ma von eahm an Faulenzer ausburgt, damit i ja grad schreib und net auf a schiefe Ebene kumm.

Wia i fertig war, hat er se es ganz genau durchglesen und hat gsagt: , Se habn zwar zwa U- Hakerln vergessen, da wärn S eigentlich scho fällig, weil die Angaben fehlerfrei sein müssn, aber i lass Ihna durchgehn. Trotzdem kann i aber kan Kredit gebn, weil Sie nämlich die wichtigste Frage bewusst wahrheitswidrig beantwortet habn.’ , Ja’, sag i. , Was denn?’ Mant er: , Hier steht: << Habn Sie bereits irgendwo Schulden?>> Und da habn Sie hingschrieben: << Nein!>>’

Sag i: , I hab nirgends Schulden.

, So? Sind Sie sich da wirklich ganz sicher? Hundertprozentig sicher?’, hat er mi gfragt und hat mei Uhr eingsteckt. , Und was is mit dem Kredit beim Wirtn, wo mir grad warn? Habn S glaubt, des zahl i, oder wolltn S eahm um de Zech prelln? Wia i gsehn hab, i bin an Pülcher aufgsessn, bin i eahm in freispruchberechtigter Erregung mit aner Hand in sein Sack um mei Uhr und mit der anderen an de Gurgl gfahrn. Dabei hat er mi bissn.

I verlang 1000 Euro Schmerzensgeld, Kredithaie habn nämlich scharfe Zähnd.“

Der Kreditvermittler muss das Schmerzensgeld in voller Höhe und auch die Prozesskosten bezahlen.