In die Wüste schicken
Gehn S, bitte“, erkundigte sich Herr L. bei einem Mann am Wiener Stadtrand, „ könnten S mir sagen, wo da die Gartensiedlung , Zur grünen Oase’ is? I hab heut a Inserat in der Zeitung glesen, dass durt jemand an schönen Grund billig verkaufen will!“
„ Se Glückskind!“, entgegnete der Gefragte. „ Se san genau richtig! Se stehn ja scho mittn auf dem herrlichen Platzerl, des was i heut inseriert hab. Zaudern S nur net z lang, den Moment warn a paar Interessentn da!“
„ Denen müasst i aber begegnet sei“, meinte Herr L. „ Es geht doch nur a lahmiger Hohlweg da her, von aner Straßn ka Spur. Wo soll überhaupt der Grund sei? Mir stengan doch auf aner Gstettn! Grad hab i mir a Schuachsohln an aner Konservndosn zerschnittn.“
„ De Siedlung is no net richtig ausbaut“, meinte der Verkäufer. „ Sunst war ja der Grund net so büllich. I kann Ihna nur sagn, greifn S zua! So an ruhigen, ungestörten Platz kriagn S nie wieder. Des is a Stück unverfälschter Natur, wo se no Fuchs und Hase gute Nacht sagn.“
„ Auf sprechende Viecher leg i eigentlich weniger Wert!“, meinte Herr L. verärgert, „ wann i gwusst hätt, dass mi nach ana dreistündigen Tramwayfahrt a Mondlandschaft erwartet, war i net herkumma! Wia schauts denn da mitn Liacht aus?“
„ Liacht is da ka Problem“, meinte der andere. „ Im Summer wirds scho um viere liacht, und vur achte wirds net finster. Dann geht ma eh schlafn oder sitzt no a bisserl bei der Petroleumlampn.“
„ Alsdann, ka Lichtanschluss!“, rief Herr L. „ Und wia schauts mitn Wasser aus? Ma hörts rauschn, wammas Uhrwaschl auf d Erd legt? Se Lügner! Für was habn S denn da drüben a Kamel in der Schupfn steh? Se wolln ma anscheinend a Stück Wüste andrahn! Die Sahara is ja gegn den Bodn a Sumpfland!“
„ Der Herr war durch de Hitz total verwirrt“, sagte der Grundverkäufer vor Gericht. „ Des Kamel hat zu an Zirkus ghört, der bei uns damals gastiert hat. Er wollt von mir des Tramwaygeld zruck habn. Wia i naa gsagt hab, wollt er auf mi hinhaun. Mi hat nur a Radlfahrer gerettet, der is zufällig vurbeigfahrn und hat mi durch a Staubwolkn unsichtbar gmacht.“
Es kam ein Vergleich zustande.