Ордэн Працоўнай Славы

Ордэнам Працоўнай Славы ўзнагароджваюцца грамадзяне:

– за асаблівыя дасягненні ў прамысловасці, сельскай гаспадарцы, будаўніцтве, на транспарце, у сферы абслугоўвання;

– за выдатныя заслугі ў галіне культуры, літаратуры, мастацтва, адукацыі, медыцыны, навукова-даследчай дзейнасці і іншых галінах працоўнай дзейнасці;

– за самаадданую высокапрадукцыйную працу, выраб прадукцыі высокай якасці, укараненне ў вытворчасць новай тэхнікі, тэхналогіі, перадавога вопыту, асабліва каштоўныя вынаходствы і рацыяналізатарскія прапановы;

– за асаблівыя заслугі ў галіне дзяржаўнай і грамадскай дзейнасці, ва ўмацаванні законнасці, правапарадку і абараназдольнасці краіны.

Узнагароджанне праводзіцца пры ўмове шматгадовай работы ў адпаведных сферах дзейнасці.

Ордэн Працоўнай Славы ўяўляе сабой знак, у аснове якога – круглая зубчастая разетка з металу серабрыстага колеру. У верхняй частцы ордэна размешчана выява сцяга, пакрытая чырвонай, зялёнай і белай эмаллю, з надпісам залацістага колеру «ПРАЦОЎНАЯ СЛАВА». У цэнтральнай частцы ордэна, пакрытай сіняй эмаллю, размешчана рэльефная выява элементаў, якія сімвалізуюць працу людзей, занятых на транспарце, у будаўніцтве, машынабудаванні, навуцы. Цэнтральная частка ордэна аблямавана выявай шасцярні, пакрытай чорнай эмаллю. Уздоўж шасцярні ў правы і левы бок разыходзяцца пшанічныя каласы ў спалучэнні з лаўровым лісцем залацістага колеру. Унізе каласы з’яднаны стужкай, пакрытай белай эмаллю. Вышыня ордэна 46 мм, шырыня 46 мм. Адваротны бок ордэна мае гладкую паверхню, у цэнтры знаходзіцца нумар ордэна.

Ордэн пры дапамозе вушка i колца злучаецца з пяцівугольнай калодкай, абцягнутай муаравай стужкай цёмнасіняга колеру шырынёй 24 мм з падоўжнымі палоскамі. Пасярэдзіне стужкі знаходзіцца чырвоная палоска шырынёй 4 мм. З левага і правага боку ад чырвонай палоскі знаходзяцца па дзве палоскі жоўтага і блакітнага колеру шырынёй 3 мм кожная.

Ордэн вырабляецца з серабра з пазалотай.