Партфель дэпутата
У краіне актыўна ідзе падрыхтоўка да выбараў у мясцовыя Саветы народных дэпутатаў. Па той актыўнасці, якую праяўляюць палітычныя партыі, грамадскія арганізацыі і асобныя грамадзяне, бачна, што нізавыя структуры народаўладдзя – даволі аўтарытэтныя, асабліва сярод сельскага насельніцтва. І сапраўды, калі бліжэй знаёмішся з клопатамі і справамі сельскіх ды раённых Саветаў, то разумееш, што функцыянальна яны сябе яшчэ далёка не вычарпалі. Аб гэтым сведчаць яскравыя прыклады з жыцця Жлобінскага раёна Гомельскай вобласці.
ЗБез пустых размоў
мясцовых Саветаў бліжэйшыя за ўсіх «да патрэб народа» – сельскія. Праблемы, якія даводзіцца ім вырашаць, – самыя прыземленыя: працаўладкаванне, парадак у населеных пунктах, падвоз дзяцей у школу, водазабеспячэнне, стасункі з суседзямі, адносіны бацькоў з дзецьмі, кармы для свойскай жывёлы, розныя іншыя з разраду сацыяльных і бытавых. Усе іх добра ведае Аляксандр Сяргеевіч Салонін, які ўжо 10 гадоў з’яўляецца старшынёй Акцябрскага сельскага Савета. Яго гаспадарка – пяць вёсак, у якіх жывуць больш за 1430 чалавек, а таксама школы, дамы культуры, дзіцячыя сады, магазіны і іншыя аб’екты. Але галоўнае ў гэтым пераліку, вядома ж, людзі. Працаваць з імі Аляксандру Салоніну дапамагаюць 11 дэпутатаў і 4 старэйшыны.
Вельмі адметная дэталь: увесь час нашай гутаркі са старшынёй сельскага Савета дзверы яго кабінета былі адчынены. Не мае ён ніякіх сакрэтаў ад людзей, усё навідавоку – ці то размаўляе па тэлефоне, ці то прымае гасцей з раёна або вобласці. Здаецца, дробязь, але ж яна спрыяе павышэнню градуса ўзаемнага даверу і разумення вяскоўцаў і кіраўніцтва мясцовай улады.
У час майго візіту па справах завітала ў сельвыканкам мясцовы дэпутат, настаўніца пачатковых класаў Ала Аўсяннікава.
– Вось адна з нашых актывістак, – паведаміў Аляксандр Сяргеевіч. – Дзякуючы і яе клопатам вырашылася пытанне забеспячэння насельніцтва якаснай вадой.
Як высветлілася, у гэтай мясцовасці спрадвеку людзі карысталіся вадой з вялікай колькасцю жалеза ў саставе. Доўгі час ішлі размовы наконт пабудовы тут станцыі, якая зніжала б працэнт металу. Але, як у нас часам здараецца, словы ліліся бы тая вада, а праблема не вырашалася. і тады за справу ўзяліся дэпутаты. Асаблівы спрыт праявіла менавіта Ала Аўсяннікава, якая разам са сваімі калегамі па дэпутацкай справе дамаглася, каб у вёскі правялі водаправод з горада. Усё было зроблена за кошт бюджэтных сродкаў, і людзі цяпер не нарадуюцца прыемным зменам у водазабеспячэнні.
Не без задавальнення ўзгадвае Ала Аўсяннікава і выпадак, калі ўдалося адшукаць родных салдата, які загінуў у час Вялікай Айчыннай вайны на тэрыторыі сельсавета і быў пахаваны ў брацкай магіле ў вёсцы Акцябр. Яны прыехалі сюды з далёкага Казахстана і шчыра дзякавалі дэпутату за клопаты.
Мясцовая ўлада заўсёды побач з людзьмі. і кожная справа, якая спрыяе дабрабыту насельніцтва, знаходзіць у іх адпаведны водгук. Напрыклад, жыхары вельмі задаволены, што працуе фельчарска-акушэрскі пункт, а адзін раз у месяц сюды прыязджаюць урачы рознага профілю і даюць людзям патрэбныя кансультацыі. Усе вёскі сельсавета газіфікаваны, прычым жыхарам гэта абышлося толькі ў 30 працэнтаў кошту работ.