Калечыц, А.Г. Чалавек і асяроддзе: каменны век, Заходняе Палессе
А.г. калечыц. – Мінск: Беларуская навука, 2018. – 584 c.: іл. – ISBN 978-985-08-2263-5.
Увыданні прадстаўлена канцэпцыя паслядоўнага засялення палескіх абшараў ад моманту, калі першыя людзі ступілі на гэтую тэрыторыю, да пачатку эпохі выкарыстання металаў, пабудаваная на базе комплекснага аналізу вынікаў археалагічных даследаванняў на помніках Заходняга Палесся і выкарыстання даных палеагеаграфічнага вывучэння.
Асноўнай тэмай работы з’яўляецца высвятленне этапаў фарміравання экасацыяльнай сістэмы як выніку ўзаемадзеяння дзвюх падсістэм – экалагічнай і сацыяльнай. Паняцце экасацыяльная сістэма адлюстроўвае характар адносін грамадства з прыродай і сацыяльную арганізацыю і гаспадарчую дзейнасць грамадства. У працы даследуецца перыяд ад муравінскага міжледавікоўя да сярэдняга галацэну ўключна, што ў археалагічным плане адпавядае часу ад магчымага пранікнення на тэрыторыю Беларусі неандэртальцаў да завяршэння неаліту і пераходу да вытворчай гаспадарчай дзейнасці.
Манаграфія – плён 20-гадовай працы аўтара на захадзе Беларускага Палесся.
Велізарны матэрыял, назапашаны ў выніку гэтых даследаванняў, дазваляе асэнсаваць шэраг прынцыпова важных і вельмі актуальных навуковых пытанняў, якія раней не разглядаліся ці вывучаны недастаткова. Сярод іх – напрамкі і час засялення тэрыторыі, рассяленне ў экалагічных нішах, праблемы палеаэкалогіі і палеаэканомікі, матэрыяльная і духоўная культура насельніцтва каменнага веку, захаванне традыцый і пранікненне навацый і інш.
Увогуле гэта навуковая праца прысвечана рэканструкцыі экасацыяльных сістэм часу першапачатковага засялення тэрыторыі Беларусі і вызначэнню адпаведных шляхоў, этапаў, а таксама спосабаў засялення (міграцыя ці аўтахтоннае развіццё) і грунтуецца на крыніцазнаўчай базе, назапашанай шляхам раскопак помнікаў носьбітаў розных культур, якія паслядоўна змяняліся ў рэгіёне.
Кніга адрасавана гісторыкам, археолагам, краязнаўцам, а таксама ўсім, хто цікавіцца гісторыяй нашага краю.