Маршрут праз беларускае сэрца
Чарнобыльскім шляхам у 1986 годзе прайшло шмат беларусаў, многія з іх не пакінулі свае хаты, нехта вярнуўся да іх праз гады, нехта асеў на новым, больш бяспечным месцы і марыць наведаць родныя мясціны. Прыкладна такім чынам і пабудавана сацыяльна-творчая праграма “Чарнобыльскі шлях — дарога жыцця”.
Штогод артысты і грамадскія дзеячы Беларусі напярэдадні чарнобыльскай гадавіны наведваюць забруджаныя радыяцыяй раёны Беларусі, таксама суседнія расійскія і ўкраінскія, ладзяць канцэрты, даюць магчымасць рэалізаваць творчыя здольнасці дзецям і падлеткам, якія нарадзіліся на гэтай зямлі і кожны раз упэўніваюцца, што рэгіёны развіваюцца і прыгажэюць. Арганізатары гэтай праграмы — Дэпартамент па ліквідацыі наступстваў катастрофы на Чарнобыльскай АЭС МНС, Міністэрства культуры, Беларускі фонд міру і Беларускі рэспубліканскі саюз моладзі.
Па маршруту надзеі, міра і сяброўства ў гэтым годзе праехалі беларускі дзяржаўны ансамбль народнай музыкі “Свята”, лаўрэаты міжнародных конкурсаў і фэстаў Генадзь Санько і Аляксандр Заўгародні, а таксама гурт ByCity.
Кожны год канцэрты ладзяцца ў новых населеных пунктах. У аграгарадку Баршчоўка Добрушскага раёна сустракалі артыстаў з непрыхаваным захапленнем і гасціннасцю.
— Такога ўзроўню артысты выступілі на сцэне Баршчоўскага Дома культуры першы раз, — расказаў начальнік аддзела культуры Добрушскага райвыканкама Рыгор Козыраў. — Спадзяемся, што мы зноў сустрэнемся ў красавіку наступнага года.
Беларускіх артыстаў упершыню сустракалі і ў раённым цэнтры Гардзееўка Бранскай вобласці. Тут таксама нячаста бываюць прафесійныя артысты. Гледачы з замілаваннем дзякавалі беларусам і не шкадавалі далоняў, а кіраўніцтва раёна ў гэты час ужо дамаўлялася з мастацкімі кіраўнікамі наконт наступнага выступлення.
А вось у горадзе Ветка “Чарнобыльскі шлях — дарога жыцця” бывае штогод. Сустрэліся гледачы і артысты як старыя знаёмыя. Тут ужо захапляліся талентамі прафесіяналаў. Заваявалі іх сэрцы сваімі выступленнямі юныя салісткі веткаўскіх творчых калектываў Аліна Кавалёва, Мілана Урбановіч, Аліна Галустава і Сафія Дарашкова. Дарэчы, яны прымуць удзел у фінальным канцэрце, які адбудзецца ў Мінску. Такім чынам, праграма акцыі з’яўляецца яшчэ і выдатнай стартавай пляцоўкай для юных творчых талентаў.
У гэты ж дзень творчая каманда выступала і ў пасёлку гарадскога тыпу Чырвоная Гара Бранскай вобласці. І тут творчыя калектывы беларусаў не ў першы раз. Адкрыла канцэрт юная чырвонагорская салістка Вікторыя Андрушына песняй “Я жыву ў Расіі”. Яе таксама запрасілі на фінальны канцэрт у беларускую сталіцу. І, вядома, у які раз чырвонагорцы прасілі творчую каманду прыязджаць да іх.